విజయవాడకు నేడు సీఎం చంద్రబాబు

విజయవాడ: ముఖ్యమంత్రి నారా చంద్రబాబు నాయుడు నేడు విజయవాడలో పర్యటించనున్నారు. అజిత్‌సింగ్‌నగర్‌లోని మాకినేని బసవపున్నయ్య స్టేడియంలో నిర్వహించే ‘పేదలకు పట్టాభిషేకం’ కార్యక్రమంలో ఆయన పాల్గొని పేద కుటుంబాలకు ఇళ్ల క్రమబద్ధీకరణ పట్టాలను పంపిణీ చేయనున్నారు. 

ఎన్టీఆర్, కృష్ణా జిల్లాల పరిధిలోని 24,057 కుటుంబాలకు పూర్తి యాజమాన్య హక్కులు కల్పించేలా పట్టాల పంపిణీ చేపట్టనున్నారు. మొత్తం 617 ఎకరాల భూమికి సంబంధించిన ఈ ప్రక్రియతో సుమారు రూ.9,800 కోట్ల విలువైన భూమిపై లబ్ధిదారులకు హక్కులు లభించనున్నాయి. 

దశాబ్దాలుగా పెండింగ్‌లో ఉన్న ఇళ్ల స్థలాల సమస్యకు పరిష్కారం చూపే ఉద్దేశంతో ఈ కార్యక్రమాన్ని ప్రభుత్వం నిర్వహిస్తోంది. విజయవాడ నగరంలోని పలు నియోజకవర్గాలతో పాటు పరిసర ప్రాంతాల కుటుంబాలు ఈ పట్టాల ద్వారా లబ్ధి పొందనున్నాయి.