కూటమి ధర్మాన్ని పాటించాలి.. పార్టీ ఆదేశాల మేరకే అభ్యర్థుల ఎంపిక: ఎమ్మెల్యే గిడ్డి

పి. గన్నవరం మేజర్ న్యూస్ :పి. గన్నవరం మండలంలోని ఎమ్మెల్యే క్యాంపు కార్యాలయంలో జనసేన పార్టీ పి. గన్నవరం అసెంబ్లీ నియోజకవర్గ స్థానిక ఎన్నికల కోఆర్డినేషన్ కమిటీ సమావేశం నిర్వహించారు. ఈ సమావేశానికి ముఖ్య అతిథిగా పి. గన్నవరం నియోజకవర్గ శాసనసభ్యులు  గిడ్డి సత్యనారాయణ  హాజరయ్యారు.ఈ సందర్భంగా ఎమ్మెల్యే గిడ్డి మాట్లాడుతూ, ప్రతి ఒక్కరూ కూటమి ధర్మాన్ని పాటించాలని, స్థానిక సంస్థల ఎన్నికలకు సంబంధించి పార్టీ అధిష్ఠానం నుంచి వచ్చే ఆదేశాలను తూచా తప్పకుండా అమలు చేయాలని సూచించారు. 

ఎవరూ స్వతంత్రంగా అభ్యర్థులను ప్రకటించకుండా, పార్టీ నిర్ణయం మేరకు ఎంపికైన అభ్యర్థుల విజయానికి సమష్టిగా కృషి చేయాలని పిలుపునిచ్చారు.స్థానిక సంస్థల ఎన్నికల్లో 100 శాతం విజయ లక్ష్యంతో ప్రతి ఒక్కరూ సమన్వయంతో పనిచేయాలని, పార్టీ నిర్ణయించిన అభ్యర్థులకు పూర్తి మద్దతు అందించాలని అన్నారు.

ఈ సందర్భంగా నియోజకవర్గ సమన్వయకర్తలు, నిర్వాహక దళ్ సభ్యులు, కమిటీ ప్రతినిధులు తమ అభిప్రాయాలను ఎమ్మెల్యే కు వివరించారు. సమావేశంలో చర్చించిన అంశాలను పార్టీ అధిష్ఠానం దృష్టికి తీసుకెళ్తానని ఎమ్మెల్యే  వారికి హామీ ఇచ్చారు.ఈ కార్యక్రమంలో నియోజకవర్గ సమన్వయకర్తలు, నిర్వాహక దళ్ సభ్యులు, సపోర్టింగ్ సభ్యులు, తదితరులు పాల్గొన్నారు.