కళ్యాణదుర్గం ఎక్సైజ్ పోలీస్ స్టేషన్లో నాలుగు వాహనాలకు బహిరంగ వేలం.

**కళ్యాణదుర్గం:** వివిధ నేరాలకు సంబంధించి ప్రొహిబిషన్ అండ్ ఎక్సైజ్ శాఖ అధికారులు స్వాధీనం చేసుకున్న నాలుగు వాహనాలకు ఈ నెల 18వ తేదీ బుధవారం బహిరంగ వేలం నిర్వహించనున్నట్లు కళ్యాణదుర్గం ప్రొహిబిషన్ అండ్ ఎక్సైజ్ ఇన్‌స్పెక్టర్ ఒక ప్రకటనలో తెలిపారు. అనంతపురం జిల్లా ప్రొహిబిషన్ అండ్ ఎక్సైజ్ అధికారి పర్యవేక్షణలో కళ్యాణదుర్గం ప్రొహిబిషన్ అండ్ ఎక్సైజ్ స్టేషన్ ఆవరణలో ఈ వేలం ప్రక్రియ చేపట్టనున్నట్లు వెల్లడించారు. వేలంలో పాల్గొనడానికి ఆసక్తి ఉన్నవారు ఈ నెల 18వ తేదీ ఉదయం 10 గంటలకు కళ్యాణదుర్గం ఎక్సైజ్ స్టేషన్‌కు చేరుకోవాలని సూచించారు. వేలంలో పాల్గొనే ప్రతి ఒక్కరూ తప్పనిసరిగా తమ ఆధార్ కార్డు, పాన్ కార్డు జిరాక్స్ ప్రతులను తీసుకురావాలని, జీఎస్టీకి సంబంధించిన వివరాలు కూడా కలిగి ఉండాలని స్పష్టం చేశారు. వేలం ప్రక్రియలో పాల్గొనేందుకు ముందుగా రూ.3,000 డిపాజిట్ మొత్తాన్ని చెల్లించి ఎంట్రీ పాస్ పొందాల్సి ఉంటుందని తెలిపారు. నిర్ణీత డిపాజిట్ చెల్లించిన వారికి మాత్రమే వేలంలో పాల్గొనే అవకాశం ఉంటుందని పేర్కొన్నారు. వేలంలో వాహనాన్ని దక్కించుకున్న వ్యక్తి అదే రోజు వాహనానికి సంబంధించిన పూర్తి వేలం మొత్తాన్ని చెల్లించాల్సి ఉంటుందని వెల్లడించారు. అంతేకాకుండా నిర్ణయించిన మొత్తం విలువపై అదనంగా 18 శాతం జీఎస్టీని కూడా చెల్లించాల్సి ఉంటుందని తెలిపారు. మొత్తం చెల్లింపులు పూర్తయిన అనంతరం సంబంధిత వాహనాలను తీసుకెళ్లేందుకు అనుమతి ఉంటుందని పేర్కొన్నారు. ప్రభుత్వ నిబంధనల ప్రకారం పారదర్శకంగా బహిరంగ వేలం నిర్వహించనున్న నేపథ్యంలో ఆసక్తి గల వ్యక్తులు అవసరమైన ధ్రువపత్రాలతో సమయానికి హాజరై ఈ అవకాశాన్ని వినియోగించుకోవాలని ఎక్సైజ్ అధికారులు సూచించారు. వేలానికి సంబంధించిన మరిన్ని వివరాల కోసం కళ్యాణదుర్గం ప్రొహిబిషన్ అండ్ ఎక్సైజ్ స్టేషన్‌ను సంప్రదించాలని తెలిపారు.
కళ్యాణదుర్గం టౌన్ రిపోర్టర్ :- బోయ రంగస్వామి.