కడియం మండలంలో ప్లాస్టిక్‌ నియంత్రణపై అధికారుల నిర్లక్ష్యం! చెత్త నిర్వహణ, వాయు కాలుష్య నివారణకు చర్యలు తీసుకోవాలి
కడియం, మేజర్ న్యూస్ కడియం మండలంలో సింగిల్‌ యూజ్‌ ప్లాస్టిక్‌ వినియోగాన్ని నియంత్రించడంతోపాటు, గ్రామాల్లో చెత్త నిర్వహణను మెరుగుపరిచేందుకు అధికారులు కఠిన చర్యలు తీసుకోవాలని కడియం మండల బిజెపి అధ్యక్షుడు బొరుసు సుబ్రహ్మణ్యం కోరారు. ఈ మేరకు జిల్లా కలెక్టర్‌, ప్రజా ఫిర్యాదుల పరిష్కార విభాగానికి సోమవారం వినతిపత్రం సమర్పించారు.
మండలంలోని గ్రామాల్లో ప్లాస్టిక్‌ వ్యర్థాలు పేరుకుపోతున్నాయని, సరైన చెత్త నిర్వహణ సౌకర్యాలు లేకపోవడంతో పారిశుధ్య సమస్యలు తలెత్తుతున్నాయని తెలిపారు. చెత్తను బహిరంగంగా తగలబెట్టడం వల్ల వాయు కాలుష్యం పెరిగి ప్రజారోగ్యానికి ముప్పు ఏర్పడుతోందని ఆందోళన వ్యక్తం చేశారు.దుకాణాలు, మార్కెట్లు, హోటళ్లలో ప్లాస్టిక్‌ వినియోగంపై ఆకస్మిక తనిఖీలు నిర్వహించి, నిబంధనలు ఉల్లంఘించేవారిపై జరిమానాలు విధించాలని కోరారు.
గ్రామ పంచాయతీల్లో శాస్త్రీయ చెత్త నిర్వహణ వ్యవస్థను ఏర్పాటు చేయాలని, బహిరంగంగా చెత్తను తగలబెట్టేవారిపై చట్టపరమైన చర్యలు తీసుకోవాలని విజ్ఞప్తి చేశారు.అలాగే, విధుల్లో నిర్లక్ష్యం వహిస్తున్నారని ఆరోపణలు ఎదుర్కొంటున్న సంబంధిత కాలుష్య నియంత్రణ అధికారులపై విచారణ జరిపి తగిన చర్యలు తీసుకోవాలని బొరుసు సుబ్రహ్మణ్యం కోరారు. ప్రజారోగ్యం, పర్యావరణ పరిరక్షణ దృష్ట్యా అధికారులు తక్షణమే స్పందించాలని విజ్ఞప్తి చేశారు.
