కడప రాజకీయాల్లో కలకలం.. ఎమ్మెల్యే పదవికి ఆదినారాయణ రెడ్డి రాజీనామా యోచన?
కడప/అమరావతి, నవంబర్ 20: వైఎస్సార్ కడప జిల్లా కూటమి రాజకీయాల్లో ఒక్కసారిగా వేడి రాజుకుంది. జమ్మలమడుగు బీజేపీ ఎమ్మెల్యే ఆదినారాయణ రెడ్డి తన ఎమ్మెల్యే పదవికి రాజీనామా చేసే యోచనలో ఉన్నట్లు తెలుస్తుండటం స్థానిక రాజకీయాల్లో సంచలనం రేపుతోంది.
కడప జిల్లా పరిషత్ (జడ్పీ) చైర్మన్ పీఠాన్ని తెలుగుదేశం పార్టీకి కేటాయించడంపై ఆదినారాయణ రెడ్డి తీవ్ర అసంతృప్తి వ్యక్తం చేస్తున్నట్లు సమాచారం. ఈ విషయంలో కూటమి నేతల తీరుపై ఆయన అలకబూనారని, తన అభిప్రాయాలకు ప్రాధాన్యత ఇవ్వలేదని ఆవేదనతో ఉన్నట్లు పార్టీ వర్గాల్లో చర్చ జరుగుతోంది. ఈ పరిణామాల నేపథ్యంలో ఆయన హుటాహుటిన కడప నుంచి విజయవాడకు బయలుదేరడం ప్రాధాన్యత సంతరించుకుంది. అక్కడ పార్టీ అధిష్టానం, కూటమి పెద్దలతో భేటీ అయి తన అసంతృప్తిని వెళ్లగక్కే అవకాశం ఉన్నట్లు తెలుస్తోంది. ఆదినారాయణ రెడ్డి తదుపరి నిర్ణయంపై కడప జిల్లా కూటమి శ్రేణుల్లో ఉత్కంఠ నెలకొంది.