andhrapradesh
ఏపీఎండీసీ ఐపీఓకు వచ్చే ఏడాది డిసెంబర్ డెడ్లైన్..
అమరావతి, నవంబర్ 20: ఆంధ్రప్రదేశ్లో ఖనిజ వనరుల సమర్థ వినియోగం, ఆదాయ పెంపు లక్ష్యంగా మైనింగ్ శాఖ ఉన్నతాధికారులతో ముఖ్యమంత్రి నారా చంద్రబాబు నాయుడు సమీక్ష నిర్వహించారు. రాష్ట్ర ఖనిజాభివృద్ధి సంస్థ (APMDC) వద్ద ప్రస్తుతం రూ.7.8 లక్షల కోట్ల విలువైన ఖనిజ నిక్షేపాలు ఉన్నాయని అధికారులు ఈ సందర్భంగా సీఎంకు వివరించారు. ఏపీఎండీసీ ఈక్విటీ విలువ రూ.86,290 కోట్లుగా అంచనా వేయగా, సంస్థను పబ్లిక్ ఇష్యూ (IPO)కు తీసుకెళ్లే ప్రక్రియను వచ్చే ఏడాది డిసెంబర్ నాటికి పూర్తి చేయాలని ముఖ్యమంత్రి డెడ్లైన్ విధించారు.
భవిష్యత్ అవసరాలను దృష్టిలో ఉంచుకుని లిథియం, కోబాల్ట్, నికెల్ వంటి కీలక ఖనిజాల వెలికితీతలో పెట్టుబడులను ఆకర్షించాలని సీఎం ఆదేశించారు. ఇందులో భాగంగా రాష్ట్రంలో ప్రత్యేకంగా 'రేర్ ఎర్త్ డెవలప్మెంట్ కార్పొరేషన్' ఏర్పాటుకు ముఖ్యమంత్రి ఆమోదం తెలిపారు. అలాగే, ఆర్టిఫిషియల్ ఇంటెలిజెన్స్ (AI) సాంకేతికత సహాయంతో రాష్ట్రవ్యాప్తంగా 582 కొత్త ఖనిజ అన్వేషణ ప్రాంతాలను గుర్తించినట్లు అధికారులు తెలిపారు.
జాతీయ స్థాయిలోనూ ఏపీఎండీసీ కార్యకలాపాలను విస్తరించేలా ఒడిశా, జార్ఖండ్ రాష్ట్రాల్లో జరగనున్న బొగ్గు బ్లాకుల వేలంలో పాల్గొనాలని నిర్ణయించారు. మరోవైపు, రాష్ట్రంలో పెండింగ్లో ఉన్న క్వారీ లీజుల సమస్యలను సత్వరమే పరిష్కరించడం ద్వారా ప్రభుత్వానికి రూ.400 కోట్ల అదనపు ఆదాయం సమకూరిందని సీఎం చంద్రబాబు వెల్లడించారు. పారదర్శక విధానాలతో గనుల శాఖ ద్వారా రాష్ట్రానికి గరిష్ఠ ఆదాయం వచ్చేలా చర్యలు తీసుకోవాలని అధికారులకు దిశానిర్దేశం చేశారు.