జర్నలిస్టుపై దాడి చేసిన వారిని కఠినంగా శిక్షించాలి
గాజువాక, సూర్య : నంద్యాల జిల్లా ఆత్మకూరుకు చెందిన ‘సాక్షి’ రిపోర్టర్‌ సుబ్బారెడ్డిపై జరిగిన దాడిని ఆంధ్రప్రదేశ్‌ యూనియన్‌ ఆఫ్‌ వర్కింగ్‌ జర్నలిస్ట్స్‌ (ఏపీయూడబ్ల్యూజే) గాజువాక కమిటీ తీవ్రంగా ఖండించింది. దాడికి పాల్పడిన వారిని తక్షణమే అరెస్టు చేసి కఠినంగా శిక్షించాలని కోరుతూ శనివారం గాజువాక తహసీల్దార్‌ త్రినాథ్‌కు పాత్రికేయులు వినతిపత్రం అందజేశారు. విధి నిర్వహణలో ఉన్న జర్నలిస్టులపై దాడులకు పాల్పడటం సరైంది కాదని, పాత్రికేయులకు ప్రభుత్వం తగిన రక్షణ కల్పించాలని ఈ సందర్భంగా నాయకులు కోరారు. భవిష్యత్తులో ఇలాంటి సంఘటనలు పునరావృతం కాకుండా దాడి చేసిన వారిపై చట్టపరమైన చర్యలు తీసుకోవాలని విజ్ఞప్తి చేశారు. ఈ కార్యక్రమంలో ఏపీయూడబ్ల్యూజే విశాఖ జిల్లా అధ్యక్షుడు కాకి రాము, గాజువాక అధ్యక్షుడు కోయిలాడ పరశురామ్‌, ఆర్గనైజింగ్‌ సెక్రటరీ కోటిరెడ్డి, సాక్షి గాజువాక ఇన్‌ఛార్జి ప్రదీప్‌ నాయుడు, రిపోర్టర్లు సందీప్‌, శ్రీనివాస్‌, రవికుమార్‌, మహేష్, సంతోష్‌, గోవింద్‌, మూర్తి, కార్తీక్‌ తదితరులు పాల్గొన్నారు.
