ఇండియా గ్రూప్ ఆఫ్ మినిస్ట్రీస్ ఆధ్వర్యంలో శిక్షణ పూర్తి!-మహిళలకు కుట్టు మిషన్ల పంపిణీ

సూర్య స్థానిక డెస్క్ (అంబాజీపేట): మహిళలు స్వయం ఉపాధి సాధించి ఆర్థికంగా తమ సొంత కాళ్లపై నిలబడాలనే సదుద్దేశంతో సీపీహెచ్ - ఇండియా గ్రూప్ ఆఫ్ మినిస్ట్రీస్ ఆధ్వర్యంలో నిర్వహించిన ఉచిత టైలరింగ్ శిక్షణ విజయవంతంగా ముగిసింది. అంబాజీపేటలోని సీపీహెచ్ మినిస్ట్రీస్ వ్యవస్థాపకులు బిషప్ జె. జార్జ్ పాప్ మార్గదర్శకత్వంలో జోసెఫ్ న్యూ లైఫ్ సెంటర్ స్కిల్ డెవలప్‌మెంట్ ట్రైనింగ్ సెంటర్‌లో శిక్షణ పూర్తి చేసుకున్న మహిళలకు గురువారం సర్టిఫికెట్లతో పాటు ఉచితంగా కుట్టు మిషన్లను అందజేశారు.

మండల యూపీఎఫ్ (UPF) అధ్యక్షులు రెవ. డా. జె. విక్టర్ కుమార్ నేతృత్వంలో ఈ కార్యక్రమం ఘనంగా జరిగింది. ఈ సందర్భంగా నిర్వాహకులు మాట్లాడుతూ.. గ్రామీణ ప్రాంత మహిళలు టైలరింగ్ నైపుణ్యాలను సద్వినియోగం చేసుకుని స్వయం ఉపాధిని పొందాలని, కుటుంబానికి చేదోడువాదోడుగా నిలుస్తూ ఆర్థిక స్వావలంబన సాధించాలని పిలుపునిచ్చారు.

ఈ కార్యక్రమంలో ముఖ్య అతిథులుగా డాక్టర్ సీహెచ్. జాన్ మోజెస్, జిల్లా యూపీఎఫ్ ట్రెజరర్ రెవ. ఎస్. ఇమ్మాన్యుయేల్, పాస్టర్ కె. తిమోతి, బెతెస్థా ప్రేయర్ టీం వ్యవస్థాపకులు రత్నం రాజు, పాస్టర్ జోసెఫ్, పాస్టర్ ప్రభు రాజేష్, పాస్టర్ నరసరాజు తదితరులు పాల్గొని శిక్షణ పొందిన మహిళలను అభినందించారు.