గోవర్ధనగిరిలో ముమ్మరంగా పోలింగ్.. ఎండలోనూ క్యూలైన్లలో మహిళలు
వెల్దుర్తి, మేజర్ న్యూస్:మండల పరిధిలోని గోవర్ధనగిరి గ్రామంలో ఎంపీటీసీ, జెడ్పీటీసీ ఎన్నికల పోలింగ్ ప్రక్రియ గురువారం ఉత్సాహభరిత వాతావరణంలో ప్రారంభమైంది. గ్రామంలో ఏర్పాటు చేసిన పోలింగ్ కేంద్రం వద్ద తమ ఓటు హక్కును వినియోగించుకునేందుకు ఉదయం నుంచే ఓటర్లు భారీ సంఖ్యలో తరలివచ్చారు.
ముఖ్యంగా మహిళా ఓటర్లు పోలింగ్ కేంద్రం వద్ద సుదీర్ఘ క్యూలైన్లలో నిలబడి ఓటు వేసేందుకు ఆసక్తి చూపారు. ఒకవైపు భానుడి ప్రతాపంతో తీవ్రమైన ఎండ కొడుతున్నప్పటికీ, పనులను పక్కనబెట్టి ఓటు వేయడానికి మహిళలు పెద్ద సంఖ్యలో తరలిరావడం గమనార్హం. పోలింగ్ కేంద్రం ఆవరణలో నీడ పడేలా సదుపాయాలు సరిగా లేకపోవడంతో క్యూలో నిలబడిన ఓటర్లు, మహిళలు తీవ్ర ఇబ్బందులు ఎదుర్కొన్నారు. ఎండ తీవ్రతను సైతం లెక్కచేయకుండా ఓటర్లు ఓటింగ్ ప్రక్రియలో ఉత్సాహంగా పాల్గొన్నారు.
పటిష్టమైన పోలీస్ బందోబస్తు మధ్య పోలింగ్ ప్రక్రియ ప్రశాంతంగా కొనసాగుతోంది. అధికారుల పర్యవేక్షణలో పోలింగ్ సిబ్బంది ఓటర్లకు ఎలాంటి ఇబ్బందులు తలెత్తకుండా ఏర్పాట్లు పర్యవేక్షిస్తున్నారు.
