గంగుబూడిలో నిరుపయోగంగా రైతు భరోసా కేంద్రం, వెల్‌నెస్‌ సెంటర్ భవనాలు!
లక్షలాది రూపాయల ప్రజాధనం వృథా.. ఫ్లోరింగ్‌ పనులు పూర్తికాక ప్రారంభోత్సవానికి నోచుకోని వైనం
అధికారులు, ప్రజాప్రతినిధులు స్పందించి భవనాలను అందుబాటులోకి తేవాలని గ్రామస్థుల విజ్ఞప్తి
లక్క వరపు కోట, మేజర్ న్యూస్ : గ్రామీణ ప్రజలకు, రైతులకు ఉపయోగపడాల్సిన ప్రభుత్వ భవనాలు నిరుపయోగంగా మారుతున్నాయి. లక్కవరపుకోట మండలం గంగుబూడి గ్రామంలో వైసీపీ ప్రభుత్వ హయాంలో గ్రామ హైస్కూల్‌ సమీపంలో నిర్మించిన రైతు భరోసా కేంద్రం, వెల్‌నెస్‌ సెంటర్ భవనాలు నేటికీ ప్రజలకు అందుబాటులోకి రాకపోవడంతో నిరుపయోగంగా మిగిలిపోయాయి. లక్షలాది రూపాయల ప్రజాధనంతో నిర్మించిన ఈ భవనాలు పూర్తిస్థాయిలో వినియోగంలోకి రాకపోవడంపై గ్రామస్థులు ఆవేదన వ్యక్తం చేస్తున్నారు.
గ్రామంలో రైతులకు సేవలందించేందుకు నిర్మించిన రైతు భరోసా కేంద్రానికి రూ.21.50 లక్షలు, ప్రజలకు వైద్య సేవలు అందించేందుకు నిర్మించిన వెల్‌నెస్‌ సెంటర్‌కు రూ.18.50 లక్షలు నిధులు మంజూరయ్యాయి. మొత్తం రూ.40 లక్షల వ్యయంతో నిర్మించిన ఈ రెండు భవనాలకు గోడల నిర్మాణం, రంగులు వేసే పనులు పూర్తిచేసినప్పటికీ, ఫ్లోరింగ్‌ పనులు పూర్తిచేయకపోవడంతో ప్రారంభోత్సవానికి నోచుకోలేదు. ఫలితంగా భవనాలు నిర్మించి చాలాకాలం గడుస్తున్నా ప్రజలకు ఎలాంటి ప్రయోజనం చేకూరడం లేదు.
పిచ్చిమొక్కలతో నిండిన భవనాల పరిసరాలు
కొత్తగా నిర్మించిన భవనాల చుట్టూ పిచ్చిమొక్కలు పెరిగిపోయి, కుక్కలు, మేకలకు ఆవాసాలుగా మారుతున్నాయి. ప్రజలకు ఉపయోగపడాల్సిన భవనాలు ఇలా నిరుపయోగంగా మారడం పట్ల గ్రామస్థులు అసంతృప్తి వ్యక్తం చేస్తున్నారు. చివరి దశలో ఫ్లోరింగ్‌ పనులు ఎందుకు నిలిచిపోయాయని సంబంధిత కాంట్రాక్టర్‌ను ప్రశ్నించగా, కొన్ని బిల్లులు పెండింగ్‌లో ఉన్నాయని, వాటిని విడుదల చేస్తే మిగిలిన పనులు పూర్తి చేస్తామని చెప్పినట్లు గ్రామస్థులు తెలిపారు.
పెండింగ్‌ బిల్లులతో నిలిచిన నిర్మాణాలు
గత ప్రభుత్వ హయాంలో చేపట్టిన కొన్ని నిర్మాణాలకు సంబంధించి కొంతమేర బిల్లులు చెల్లించినప్పటికీ, మిగిలిన బిల్లులు విడుదల కాకపోవడంతో మండలంలోని పలు రైతు భరోసా కేంద్రాలు, సచివాలయ భవనాల నిర్మాణాలు కూడా అసంపూర్తిగా నిలిచిపోయాయని స్థానికులు పేర్కొంటున్నారు.
ప్రభుత్వాలు మారినప్పటికీ ప్రజలకు ఉపయోగపడే అభివృద్ధి పనులను పూర్తి చేయాల్సిన బాధ్యత అధికారులపై, ప్రజాప్రతినిధులపై ఉందని గ్రామస్థులు అభిప్రాయపడుతున్నారు. ఇప్పటికే నిర్మాణాల కోసం ఖర్చు చేసిన ప్రజాధనం వృథా కావడంతో పాటు, రైతులు, రోగులు, సామాన్య ప్రజలు ప్రభుత్వ సేవలకు దూరమవుతున్నారని ఆవేదన వ్యక్తం చేస్తున్నారు.
ఇప్పటికైనా సంబంధిత అధికారులు, ప్రజాప్రతినిధులు స్పందించి పెండింగ్‌ పనులను పూర్తి చేయించి, గంగుబూడి గ్రామంలోని రైతు భరోసా కేంద్రం, వెల్‌నెస్‌ సెంటర్ భవనాలను ప్రజలకు అందుబాటులోకి తీసుకురావాలని గ్రామస్థులు కోరుతున్నారు.
