ఎల్ నినోను కాంగ్రెస్ కు అంటగట్టడం హాస్యాస్పదం

*బీఆర్ఎస్ దిగజారుడు రాజకీయాలకు నిదర్శనం - పీసీసీ సభ్యులు శ్రీనివాస్ గౌడ్*

కడ్తాల్: ఎల్ నినో ప్రభావం అనేది సహజ వాతావరణ ప్రక్రియ అని, దానిని కాంగ్రెస్ ప్రభుత్వానికి అంటగట్టడం బీఆర్ఎస్ దిగజారుడు రాజకీయాలకు నిదర్శనమని పీసీసీ కార్యవర్గ సభ్యులు అయిళ్ల శ్రీనివాస్ గౌడ్ విమర్శించారు.

కడ్తాల్ మండల కేంద్రంలో శనివారం ఏర్పాటు చేసిన విలేకరుల సమావేశంలో ఆయన మాట్లాడుతూ, రైతుల సంక్షేమానికి రేవంత్ రెడ్డి ప్రభుత్వం కట్టుబడి ఉందన్నారు. ఎల్ నినో కారణంగా నైరుతి రుతుపవనాలు బలహీనపడి వర్షాభావ పరిస్థితులు ఏర్పడుతాయని, ప్రజలు, ముఖ్యంగా రైతులు అప్రమత్తంగా ఉండాలని సూచించారు.

రైతు భరోసా కింద ఎకరాకు రూ.12 వేలు, రూ.2 లక్షల రుణమాఫీ, సన్న వడ్లకు బోనస్, ఉచిత విద్యుత్, రైతు బీమా వంటి పథకాలతో ప్రభుత్వం రైతులకు అండగా నిలుస్తోందన్నారు. కల్వకుర్తి ఎమ్మెల్యే కసిరెడ్డి నారాయణరెడ్డి సహకారంతో నియోజకవర్గంలో అన్ని వర్గాలకు మేలు జరుగుతుందన్నారు.

పదేళ్ల బీఆర్ఎస్ పాలనలో అతివృష్టి, అనావృష్టితో నష్టపోయిన రైతులకు ఎంత న్యాయం చేశారో చెప్పాలని ప్రశ్నించారు. అధికారంలో ఉండి పట్టించుకోకుండా ఇప్పుడు ప్రతిపక్షంలోకి వచ్చాక రైతులపై ప్రేమ ఒలకబోయడం అవకాశవాదమని మండిపడ్డారు.

ఈ సమావేశంలో డీసీసీ ఉపాధ్యక్షులు గూడూరు శ్రీనివాస్ రెడ్డి, ప్రధాన కార్యదర్శి చెగురి వెంకటేష్, బ్లాక్ కాంగ్రెస్ అధ్యక్షుడు యాట నరసింహ, మండల అధ్యక్షుడు పోతుగంటి శంకర్, బిచ్యా నాయక్, జగన్ గౌడ్, రాజు గౌడ్, యూత్ కాంగ్రెస్ ప్రధాన కార్యదర్శి క్యామ రాజేష్, షాబుద్దీన్ తదితరులు పాల్గొన్నారు.

మేజర్ న్యూస్ కడ్తాల్…