గాంధీ ఆశయాల సాధనకు ప్రతి ఒక్కరూ కృషి చేయాలి

పామూరు, మేజర్ న్యూస్ : 

 మహాత్మా గాంధీ చూపిన సత్యం, అహింస, శాంతి మార్గాలను ప్రతి ఒక్కరూ ఆదర్శంగా తీసుకుని సమాజ అభివృద్ధికి కృషి చేయాలని రాష్ట్ర తెలుగుదేశం పార్టీ విభిన్న ప్రతిభావంతుల ప్రధాన కార్యదర్శి, కనిగిరి నియోజకవర్గం క్లస్టర్‌-11 ఇన్‌చార్జ్ అడుసుమల్లి ప్రభాకర్ చౌదరి అన్నారు. గాంధీ జయంతి సందర్భంగా శుక్రవారం మండలంలోని బొట్లగూడూరు పంచాయతీలో నిర్వహించిన గ్రామసభలో ఆయన పాల్గొని మహాత్మా గాంధీ చిత్రపటానికి పూలమాల వేసి నివాళులర్పించారు. అనంతరం గ్రామసభలో మాట్లాడుతూ గ్రామాల అభివృద్ధి, ప్రజా సమస్యల పరిష్కారం, పారిశుద్ధ్య పరిరక్షణలో ప్రజల భాగస్వామ్యం ఎంతో అవసరమన్నారు. గ్రామసభల ద్వారా ప్రజల అవసరాలను గుర్తించి వాటి పరిష్కారానికి కృషి చేయాలన్నారు. ఈ కార్యక్రమంలో స్పెషల్ ఆఫీసర్, డిప్యూటీ ఎంపీడీవో సుందర రామయ్య, పంచాయతీ కార్యదర్శి వెంకటేశ్వర రెడ్డి, మాజీ సర్పంచ్ ఎర్రగొల్ల బాల, విలేజ్ రెవెన్యూ ఆఫీసర్ గరీబా, అంగన్‌వాడీ సూపర్‌వైజర్ పద్మజ, ఫీల్డ్ అసిస్టెంట్ ఆవుల నరసింహం, అంగన్‌వాడీ సిబ్బంది, పంచాయతీ సిబ్బంది, గ్రామ ప్రజలు పాల్గొన్నారు.