గజలక్ష్మి అలంకారంలో శ్రీ రాజరాజేశ్వరి అమ్మవారు

నెల్లూరు కల్చరల్ మేజర్ న్యూస్  :   నెల్లూరు నగరంలోని దుర్గామిట్టలో కొలువై ఉన్న శ్రీ రాజరాజేశ్వరి అమ్మవారి దేవస్థానంలో శరన్నవరాత్రి మహోత్సవాలు అత్యంత వైభవంగా కొనసాగుతున్నాయి. ఉత్సవాల్లో భాగంగా గురువారం నాడు అమ్మవారిని 'శ్రీ గజలక్ష్మి' దేవిగా అలంకరించారు. ఈ ప్రత్యేక అలంకారంలో కొలువుదీరిన అమ్మవారిని దర్శించుకునేందుకు భక్తులు విశేష సంఖ్యలో ఆలయానికి తరలివచ్చి, ప్రదక్షిణలు చేసి తీర్థప్రసాదాలు స్వీకరించారు. గురువారం జరిగిన వివిధ పూజా కార్యక్రమాలకు దాతలు ఉభయకర్తలుగా వ్యవహరించారు. శ్రీ గజలక్ష్మి అలంకారానికి నిప్పో ఛైర్మన్ అండ్ ఎం.డి పొట్టిపాటి ద్వారకనాథ్ రెడ్డి ఉభయకర్తగా వ్యవహరించారు. ఆలయ ప్రాంగణంలోని శ్రీ సుందరేశ్వరస్వామి ఆలయంలో జరిగిన శ్రీ లలితా కుంకుమార్చన, మహాన్యాస పూజలకు  వేణుగోపాల్ - సాయి స్నేహిత దంపతులు, సాయంత్రం నిర్వహించిన ప్రత్యేక పుష్పాలంకారానికి నెల్లూరుకు చెందిన  వెంకట రమేష్‌కుమార్ - సువర్ణలక్ష్మి దంపతులు ఉభయకర్తలుగా వ్యవహరించారు.
ఈ వేడుకలను ఆలయ సహాయ కమిషనర్, కార్యనిర్వహణాధికారి నూతలపాటి శ్రీధర్ నాయుడు, ముఖ్య ఉత్సవ అధికారి కోవూరు జనార్దన్ రెడ్డి, ఆలయ ఛైర్మన్ ఏలూరు శిరీష, ధర్మకర్తల మండలి సభ్యులు దగ్గరుండి పర్యవేక్షించారు.