గాజువాక వైకాపా నేతలతో మేయర్ అభ్యర్థి వరుదు కళ్యాణి మర్యాదపూర్వక భేటీ

గాజువాక, సూర్య : గ్రేటర్ విశాఖపట్నం మున్సిపల్ కార్పొరేషన్ వైకాపా మేయర్ అభ్యర్థి వరుదు కళ్యాణి బుధవారం గాజువాక నియోజకవర్గంలో పార్టీ ముఖ్య నేతలను మర్యాదపూర్వకంగా కలుసుకున్నారు. పార్టీ పొలిటికల్ అడ్వైజరీ కమిటీ (పీఏసీ) సభ్యుడు తిప్పల నాగిరెడ్డి, గాజువాక నియోజకవర్గ సమన్వయకర్త తిప్పల శ్రీనివాస దేవన్ రెడ్డిలతో ఆమె ప్రత్యేకంగా సమావేశమై పలు కీలక రాజకీయ అంశాలపై మాట్లాడారు. ఈ భేటీలో ప్రధానంగా గాజువాక నియోజకవర్గ పరిధిలోని వార్డుల వారీ వివరాలు, క్షేత్రస్థాయిలో నెలకొన్న స్థానిక సమస్యలు, ప్రజల అవసరాలు, చేపట్టాల్సిన అభివృద్ధి కార్యక్రమాలపై వారితో సుదీర్ఘంగా చర్చించారు. జీవీఎంసీ పరిధిలో మేయర్ స్థానంతో పాటు నియోజకవర్గ పరిధిలోని అన్ని వార్డుల్లో పార్టీ అభ్యర్థుల గెలుపే లక్ష్యంగా సమష్టిగా కృషి చేసి, సంపూర్ణ సహకారం అందించాలని ఈ సందర్భంగా వరుదు కళ్యాణి వారికి విజ్ఞప్తి చేశారు. దీనిపై సానుకూలంగా స్పందించిన తిప్పల నాగిరెడ్డి, దేవన్ రెడ్డిలు మాట్లాడుతూ.. గాజువాకలో అత్యధిక వార్డులతో పాటు మేయర్ ఓటింగ్ శాతం కూడా కచ్చితంగా పెరుగుతుందని స్పష్టం చేశారు.

రిపోర్టర్ : కోటి రెడ్డి, గాజువాక, విశాఖపట్నం.