ఎస్పీడబ్ల్యూలో బ్రేక్ ది సైలెన్స్ కార్యక్రమం

ఎడ్యుకేషన్ స్టాఫ్ రిపోర్టర్ : పద్మావతి మహిళా డిగ్రీ, పీజీ కళాశాలలో బ్రేక్ ది సైలెన్స్ కాల్ 1972 అనే అంశంపై విద్యార్థినులకు అవగాహన కార్యక్రమం నిర్వహించారు. మై భారత్, ఈగల్ టీమ్, రాజనీతి శాస్త్రం విభాగం సంయుక్త ఆధ్వర్యంలో జరిగిన ఈ కార్యక్రమానికి కళాశాల ప్రిన్సిపల్ డాక్టర్ ఎన్ భీమన్న అధ్యక్షత వహించి, మాట్లాడుతూ నేడు యువత చెడు వ్యసనాలకు లోనవుతున్నారని, సన్మార్గంలో పయనించాలంటే అవగాహన కార్యక్రమాలు నిర్వహించడం ఆవశ్యకమని తెలిపారు. ప్రపంచాన్ని పట్టిపీడిస్తున్న సమస్యల్లో మాదకద్రవ్యాల వినియోగం ప్రధానమైనదని, వాటికి యువత బానిసలు అవుతున్నారని చెప్పారు. విద్యార్థులు పట్టుదలతో చదువుకొని జ్ఞానాన్ని సంపాదిస్తే అది మంచి వైపు నడిపిస్తుందన్నారు. ప్రతి ఒక్క విద్యార్థిని శక్తియాప్ను డౌన్లోడ్ చేసుకోవాలని ఆపదలో ఉన్న వాళ్ళని రక్షించే రక్షణ కవచం అన్నారు. అనంతరం ఈగల్ టీమ్ సభ్యులు గోవింద్ మాట్లాడుతూ గంజాయిని వినియోగిస్తున్నట్లు అనుమానం కలిగినా, వారి వద్ద ఉన్నట్లు తెలిసినా వెంటనే 1972 నెంబర్ కి తెలియజేయాలన్నారు. ఈ కార్యక్రమంలో ఎస్ఐ గిరిజ, షీటీమ్ సభ్యులు, అధ్యాపకులు, విద్యార్థినులు పాల్గొన్నారు.

సీఎం గౌడ్ తిరుపతి స్టాఫ్ రిపోర్టర్