ఏపీపీ కే సునీల్ కుమార్ బలమైన వాదనలు
నేటి దినపత్రిక సూర్య బ్యూరో రాజమహేంద్రవరం
భార్యను కాపురానికి పంపడం లేదన్న కక్షతో అత్తమామలు, భార్యను దారుణంగా హత్య చేసిన వ్యక్తికి న్యాయస్థానం జీవిత ఖైదు విధించింది. ఈ కేసులో బాధితుల తరఫున అదనపు పబ్లిక్ ప్రాసిక్యూటర్ కె. సునీల్ కుమార్ న్యాయస్థానంలో బలమైన వాదనలు వినిపించారు. ప్రాసిక్యూషన్ తరఫున సాక్ష్యాధారాలను సమర్థంగా వినిపించడంతో నేరం రుజువైంది. దీంతో ముగ్గురి హత్య కేసులో జీవిత ఖైదుతో పాటు రూ.10 వేల జరిమానా, భార్య వదినపై హత్యాయత్నం చేసిన కేసులో మరో పదేళ్ల కఠిన కారాగార శిక్ష, రూ.10 వేల జరిమానా విధిస్తూ రామచంద్రపురం 13వ అదనపు జిల్లా కోర్టు న్యాయమూర్తి బి.హెచ్.వి. లక్ష్మీకుమారి మంగళవారం తీర్పు వెలువరించారు. వివరాల్లోకి వెళితే.. అంబటి కృష్ణంరాజు అనే వ్యక్తి తన భార్య అంబటి ప్రేమావతి, అత్తమామలు బద్దా అబ్బాయి, బద్దా కమలలను కాపురానికి పంపడం లేదన్న కారణంతో చంపుతానని గతంలో బెదిరించాడు. ఈ క్రమంలో 2013 ఆగస్టు 12, 13 తేదీల మధ్య రాత్రి సుమారు 2 గంటల సమయంలో కేశవరం శ్రీ వెంకటలక్ష్మి రైస్ మిల్లు ఆవరణలోని నివాస ప్రాంతంలో నిద్రిస్తున్న భార్య, అత్తమామల తలలపై ఇనుపరాడ్డుతో బలంగా కొట్టి హత్య చేశాడు. అదే సమయంలో భార్య పక్కన నిద్రిస్తున్న ఆమె అన్నయ్య భార్య (వదిన)పై కూడా ఇనుపరాడ్డుతో దాడి చేసి హత్యాయత్నానికి పాల్పడ్డాడు. అనంతరం వారు మరణించారని భావించి, భార్య పక్కన ఉన్న కుమారుడిని తీసుకెళ్లి తన తల్లిదండ్రుల వద్ద విడిచిపెట్టి పరారయ్యాడు. తీవ్రంగా గాయపడిన భార్య వదిన ఆసుపత్రిలో చికిత్స పొంది ప్రాణాలతో బయటపడింది. ఈ ఘటనపై భార్య అన్నయ్య ఇచ్చిన ఫిర్యాదు మేరకు అప్పటి పోలీసులు కేసు నమోదు చేశారు. అప్పటి ఎస్సై ఎన్. లక్ష్మణస్వామి కేసు నమోదు చేయగా, సీఐ పి.వి. రమణ దర్యాప్తు నిర్వహించి నిందితుడిని అరెస్టు చేసి న్యాయస్థానంలో అభియోగపత్రం దాఖలు చేశారు. సుదీర్ఘ విచారణ అనంతరం నేరం రుజువు కావడంతో ముగ్గురి హత్య కేసులో నిందితుడికి జీవిత ఖైదు, రూ.10 వేల జరిమానా, భార్య వదినపై హత్యాయత్నం కేసులో పదేళ్ల కఠిన కారాగార శిక్ష, మరో రూ.10 వేల జరిమానా విధిస్తూ న్యాయమూర్తి తీర్పునిచ్చారు. ఈ కేసులో బాధితుల తరఫున అదనపు పబ్లిక్ ప్రాసిక్యూటర్ కె. సునీల్ కుమార్ న్యాయస్థానంలో వాదనలు వినిపించారు. కోర్టు లైజన్ హెడ్ కానిస్టేబుల్ కె.వి. రాఘవులు, మండపేట రూరల్ పోలీస్ స్టేషన్ ఎస్సై సతీష్ సాక్షులను కోర్టులో హాజరుపరిచారు. కేసు దర్యాప్తు, పర్యవేక్షణలో కీలకంగా వ్యవహరించిన మండపేట రూరల్ సీఐ పి. దొరరాజును ఉన్నతాధికారులు అభినందించారు.