ఏపీలో ప్రశాంతంగా నామినేషన్ల ప్రక్రియ.. చివరి రోజు కావడంతో భారీగా దాఖలు
అమరావతి: ఆంధ్రప్రదేశ్‌లో నామినేషన్ల ప్రక్రియ ప్రశాంతంగా కొనసాగుతోంది. నామినేషన్లకు చివరి రోజు కావడంతో అభ్యర్థులు భారీ సంఖ్యలో నామినేషన్లు దాఖలు చేశారు. అక్కడక్కడా చెదురుమదురు ఘటనలు మినహా రాష్ట్రవ్యాప్తంగా ప్రక్రియ కొనసాగుతోంది. ఫిర్యాదులు వచ్చిన చోట పోలీసులు ప్రత్యేక భద్రత కల్పించి, వాహనాల్లో తీసుకెళ్లి నామినేషన్లు వేయించారు.
* కడప కలెక్టరేట్‌లోకి వైయస్సార్సీపీ కార్పొరేటర్లను పోలీసు బందోబస్తుతో తీసుకెళ్లి నామినేషన్లు వేయించారు.
* నరసరావుపేట ఆర్డీవో ఆఫీసును కలెక్టర్‌ కృతికా శుక్లా పరిశీలించారు. అభ్యర్థులకు పూర్తి భద్రత కల్పిస్తామని, నామినేషన్లు వేసేందుకు ఇబ్బందులు ఉంటే నేరుగా తనకు ఫోన్‌ చేయాలని భరోసా ఇచ్చారు.
* అచ్చంపేటలో వైయస్సార్సీపీ ఫిర్యాదుపై ఆర్వో సురేష్‌ స్పందిస్తూ అభ్యర్థులకు పూర్తి రక్షణ కల్పిస్తామని హామీ ఇచ్చారు.
* అనంతపురం జెడ్పీ కార్యాలయం వద్ద భారీగా పోలీసు బలగాలను మోహరించగా, ఎస్పీ జగదీష్‌ స్వయంగా పరిశీలించారు.
