ఎన్టీఆర్ పోలీస్ ట్రాఫిక్ వింగ్ ప్రత్యేక వెబ్సైట్ ప్రారంభం
విజయవాడ క్రైం, మేజర్ న్యూస్: విజయవాడ ప్రజలకు ట్రాఫిక్ సమాచారాన్ని మరింత సులభంగా అందించడంతో పాటు సురక్షిత ప్రయాణానికి వీలుగా ఎన్టీఆర్ పోలీస్ కమిషనరేట్ రూపొందించిన ప్రత్యేక వెబ్సైట్ ‘ఎన్టీఆర్ పోలీస్ ట్రాఫిక్ వింగ్’ను పోలీస్ కమిషనర్ ఎస్.వి. రాజశేఖర బాబు ఐపీఎస్ శనివారం లాంఛనంగా ప్రారంభించారు. పోలీస్ కమిషనర్ ప్రత్యేక మార్గదర్శకత్వంలో ఖాకీ స్టూడియో ఆధ్వర్యంలో ‘ప్రజల కోసం... సురక్షిత ప్రయాణం కోసం’, ‘ప్రజల భాగస్వామ్యంతో మెరుగైన ట్రాఫిక్ నిర్వహణ’ అనే నినాదాలతో ఈ డిజిటల్ వేదికను అందుబాటులోకి తీసుకొచ్చారు. ఈ వెబ్సైట్ ద్వారా నగరంలోని తాజా ట్రాఫిక్ అప్డేట్స్, రహదారుల మూసివేతలు, దారి మళ్లింపులు, భారీ వాహనాల రాకపోకలపై ఆంక్షలు, ప్రత్యామ్నాయ మార్గాలు, రూట్ మ్యాప్స్, పార్కింగ్ ప్రదేశాల వివరాలను ప్రజలు తెలుసుకోవచ్చు. అదేవిధంగా రోడ్డు భద్రత, ట్రాఫిక్ నిబంధనలపై అవగాహన కల్పించే వీడియోలను వీక్షించవచ్చు. తప్పుగా పార్కింగ్ చేసిన వాహనాలు, ట్రాఫిక్కు ఆటంకం కలిగించే సమస్యలపై ఫొటో, వివరాలు, లొకేషన్తో నేరుగా పోలీసులకు ఫిర్యాదు చేసే అవకాశం కూడా కల్పించారు. ఫిర్యాదు చేసిన అనంతరం రిఫరెన్స్ నంబర్ ద్వారా దాని పరిష్కార స్థితిని తెలుసుకోవచ్చు. ఈ సందర్భంగా పోలీస్ కమిషనర్ ఎస్.వి. రాజశేఖర బాబు మాట్లాడుతూ ట్రాఫిక్ సమాచారం ఇక ప్రజల చేతుల్లోనే ఉంటుందని, ‘మీ సూచన... మా చర్య... మెరుగైన ట్రాఫిక్... మనం అందరం కలసి!’ అనే స్ఫూర్తితో ఈ వెబ్సైట్ను రూపొందించామని తెలిపారు. పౌరులు ప్రయాణానికి ముందే వెబ్సైట్ ద్వారా ట్రాఫిక్ సమాచారాన్ని తెలుసుకుని సురక్షితంగా గమ్యస్థానాలకు చేరుకోవాలని, ట్రాఫిక్ నిబంధనలు పాటిస్తూ పోలీసులకు సహకరించాలని కోరారు. https://ntr-police-traffic-updates.pages.devలింక్పై క్లిక్ చేయడం ద్వారా లేదా ఎన్టీఆర్ పోలీసులు విడుదల చేసిన పోస్టర్లోని క్యూఆర్ కోడ్ను స్కాన్ చేయడం ద్వారా ఈ సేవలను వినియోగించుకోవచ్చని తెలిపారు. ఈ కార్యక్రమంలో ట్రాఫిక్ డీసీపీ షిరీన్ బేగం ఐపీఎస్, అడ్మిన్ డీసీపీ కె.జి.వి. సరిత ఐపీఎస్, ట్రాఫిక్ ఏసీపీ డి. పావన్ కుమార్, పీసీఆర్ ఇన్స్పెక్టర్ ఎం.వి. దుర్గారావు, కమాండ్ కంట్రోల్, ఖాకీ స్టూడియో సిబ్బంది తదితరులు పాల్గొన్నారు.
స్టాఫ్ రిపోర్టర్: ✍️ ప్రేమ్ రాజ్, విజయవాడ, ఎన్టీఆర్ జిల్లా.