డ్వాక్రా మహిళల సంఘ భవనాల నిర్మాణానికి రూ 6.28 కోట్లు

మండపేట మేజర్ న్యూస్ : మండపేట నియోజకవర్గంలోని డ్వాక్రా మహిళల జీవన ప్రమాణాలను మెరుగుపరచడంతో పాటు, మహిళా సంఘాలు సమావేశాలు నిర్వహించు కునేందుకు వీలుగా సంఘ భవనాల నిర్మాణానికి ప్రభుత్వం రూ.6.28 కోట్లు మంజూరు చేసినట్లు రాష్ట్ర అంచనాల కమిటీ చైర్మన్, మండపేట ఎమ్మెల్యే వేగుళ్ల జోగేశ్వరరావు తెలిపారు. డ్వాక్రా మహిళలకు గత ఎనిమిదేళ్లుగా రావాల్సిన ధాన్యం కొనుగోలు కమిషన్ నిధులు పెండింగ్‌లో ఉన్నాయని ఎమ్మెల్యే పేర్కొన్నారు. కూటమి ప్రభుత్వం అధికారంలోకి వచ్చిన అనంతరం జిల్లా పరిషత్ సమావేశాల్లో ఈ అంశాన్ని పలుమార్లు ప్రస్తావించడంతో పాటు, అధికారులతో ఉత్తర ప్రత్యుత్తరాలు జరిపి నిధులను ఉమ్మడి తూర్పుగోదావరి జిల్లా నుంచి డాక్టర్ బి.ఆర్. అంబేద్కర్ కోనసీమ జిల్లాకు బదిలీ చేయించినట్లు తెలిపారు.మండపేట నియోజకవర్గం తిరిగి తూర్పుగోదావరి జిల్లాలో విలీనం కావడంతో జిల్లా పరిధిలో రూ.1.15 కోట్లు మాత్రమే అందుబాటులో ఉన్నట్లు అధికారులు వెల్లడించారని, దీంతో కాకినాడ, తూర్పుగోదావరి, డాక్టర్ బి.ఆర్. అంబేద్కర్ కోనసీమ జిల్లాల కలెక్టర్లను స్వయంగా కలిసి సమన్వయం చేసి మొత్తం నిధులను సాధించినట్లు వేగుళ్ల వివరించారు.ఈ నిధులతో నియోజకవర్గంలోని పలు గ్రామాల్లో డ్వాక్రా సంఘ భవనాలను నిర్మించనున్నట్లు తెలిపారు. గ్రామాల వారీగా ద్వారపూడికి రూ.1 కోటి, చెల్లూరుకు రూ.90 లక్షలు, నేలటూరుకు రూ.90 లక్షలు, అంగరకు రూ.80 లక్షలు, కేశవరానికి రూ.69 లక్షలు, అర్తమూరుకు రూ.46 లక్షలు, మాచవరానికి రూ.41 లక్షలు, వెంటూరుకు రూ.35.89 లక్షలు, వెదురుపాకకు రూ.33 లక్షలు, వెలగతోడుకు రూ.31 లక్షలు, తాపేశ్వరానికి రూ.27 లక్షలు మంజూరైనట్లు తెలిపారు.గ్రామ సమాఖ్య సంఘ సమావేశాలు లేని సమయంలో ఈ భవనాలను వివాహాది శుభకార్యక్రమాలు, ఇతర సామాజిక కార్యక్రమాలకు అద్దెకు ఇవ్వడం ద్వారా గ్రామ సమాఖ్యలు అదనపు ఆదాయం పొందే అవకాశం ఉంటుందని ఎమ్మెల్యే పేర్కొన్నారు.

డ్వాక్రా సంఘ భవనాల నిర్మాణానికి త్వరలోనే టెండర్లు పిలిచి పనులను ప్రారంభిస్తామని, నిర్మాణాలను వేగవంతంగా పూర్తి చేసి మహిళా సంఘాలకు అందుబాటులోకి తీసుకువస్తామని వేగుళ్ల జోగేశ్వరరావు స్పష్టం చేశారు