దుర్గాదేవి అలంకారంలో దర్శనమిచ్చిన శ్రీ ఇరుకళల పరమేశ్వరి అమ్మవారు

నెల్లూరు కల్చరల్ మేజర్ న్యూస్ 
నెల్లూరు నగరంలోని మూలాపేటలో వేంచేసియున్న శ్రీ ఇరుకళల పరమేశ్వరి అమ్మవారి దేవస్థానంలో శ్రీ దేవీ శరన్నవరాత్రి మహోత్సవాలు అత్యంత వైభవంగా జరుగుతున్నాయి. ఉత్సవాల్లో భాగంగా ఆరవ రోజైన శుక్రవారం ఉదయం అమ్మవారి మూలవర్లకు విశేష అభిషేకం, కలశపూజ, చండీహోమం శాస్త్రోక్తంగా నిర్వహించారు. మూలవర్ల అభిషేకానికి మెట్టు సురేష్ బాబు, సుభాషిణి దంపతులు ఉభయకర్తలుగా వ్యవహరించగా, కలశపూజ, చండీహోమ కార్యక్రమాలకు గేనేడి వెంకటేశ్వర్లు నాయుడు, సునీతమ్మ దంపతులు ఉభయకర్తలుగా పాల్గొన్నారు.
సాయంత్రం అమ్మవారు ప్రత్యేక అలంకారంలో 'దుర్గాదేవి'గా భక్తులకు దర్శనమిచ్చారు. ఈ అలంకారానికి జంపని వంశీ కృష్ణ, మాధవి దంపతులు ఉభయకర్తలుగా వ్యవహరించారు. అనంతరం కట్టంరెడ్డి ప్రతాప్ రెడ్డి, సుమన దంపతుల ఉభయంతో సామూహిక లలితా సహస్రనామ పారాయణ భక్తిశ్రద్ధలతో జరిగింది. ఈ కార్యక్రమాలలో ఆలయ చైర్మన్ సురేంద్ర యాదవ్, ధర్మకర్తల మండలి సభ్యులు, కార్యనిర్వహణాధికారి గిరి కృష్ణ, అర్చక బృందం, దేవస్థాన సిబ్బంది పాల్గొన్నారు