భీమవరంలో ఘనంగా జాతీయ స్థాయి టెన్నిస్ టోర్నమెంట్'

 భీమవరం, సూర్య న్యూస్:ఆల్ ఇండియా టెన్నిస్ అసోసియేషన్ (AITA), ఆంధ్రప్రదేశ్ లాన్ టెన్నిస్ అసోసియేషన్ (APLTA) ఆధ్వర్యంలో భీమవరం కాస్మోపాలిటన్ క్లబ్ వేదికగా ప్రతిష్టాత్మక 'సిఫీ ఐటా పురుషులు & మహిళల జాతీయ స్థాయి టెన్నిస్ టోర్నమెంట్' అక్టోబర్ 31 నుంచి నవంబర్ 6 వరకు నిర్వహించనున్నట్లు క్లబ్ మరియు టోర్నమెంట్ కమిటీ ప్రతినిధులు వెల్లడించారు. కాస్మో స్పోర్ట్స్ ట్రస్ట్ సంయుక్త నిర్వహణలో జరిగే ఈ పోటీలకు సంబంధించిన వివరాలను మంగళవారం విలేకర్ల సమావేశంలో తెలిపారు.

ఈ పోటీలకు సిఫీ గ్రూప్ ఆఫ్ కంపెనీస్ ఛైర్మన్ & మేనేజింగ్ డైరెక్టర్  రాజు వేగేశ్న ప్రధాన స్పాన్సర్‌గా వ్యవహరిస్తుండగా, ఆనంద గ్రూప్, అవంతి ఫీడ్స్ లిమిటెడ్ మరియు కాస్మోపాలిటన్ క్లబ్ సభ్యులు కో-స్పాన్సర్లుగా ఆర్థిక సహకారం అందిస్తున్నారు. ఈ టోర్నమెంట్‌లో మొత్తం రూ. 5,00,000 నగదు బహుమతితో పాటు క్రీడాకారులకు వసతి, రవాణా సౌకర్యాలు కల్పిస్తున్నారు.

పోటీల షెడ్యూల్ & వేదికలు:

అక్టోబర్ 31, నవంబర్ 1 తేదీల్లో క్వాలిఫైయింగ్ రౌండ్ మ్యాచ్‌లు జరగనుండగా, నవంబర్ 2 నుంచి 6వ తేదీ వరకు మెయిన్ డ్రా మ్యాచ్‌లు నిర్వహించనున్నారు. స్థానిక కాస్మోపాలిటన్ క్లబ్, యూత్ కల్చరల్ అసోసియేషన్, ఎల్.హెచ్. భీమవరం టౌన్ హాల్, బీవీ రాజు కళాశాలల్లోని టెన్నిస్ కోర్టులలో ఈ పోటీలు ఏకకాలంలో జరుగుతాయి. మెయిన్ డ్రాలో పురుషులు, మహిళల విభాగాల్లో డైరెక్ట్ ఎంట్రీస్ ద్వారా 24 మంది, క్వాలిఫైయింగ్ రౌండ్ ద్వారా 8 మంది చొప్పున మొత్తం 32 మంది చొప్పున బరిలోకి దిగుతారు.

నవంబర్ 2న టోర్నమెంట్ ప్రారంభోత్సవం:

నవంబర్ 2వ తేదీ (సోమవారం) సాయంత్రం 5:00 గంటలకు నిర్వహించే ప్రారంభోత్సవ కార్యక్రమానికి ఒడిశా ప్రభుత్వ మాజీ ప్రధాన కార్యదర్శి సురేష్ చంద్ర మహాపాత్ర (IAS రిటైర్డ్), పశ్చిమ గోదావరి జిల్లా కలెక్టర్ & జిల్లా మేజిస్ట్రేట్  సి. నాగరాణి (IAS) ముఖ్య అతిథులుగా విచ్చేసి పోటీలను ప్రారంభించనున్నారు.

దేశంలోని వివిధ రాష్ట్రాల నుంచి సుమారు 250 మంది క్రీడాకారులు ఈ టోర్నమెంట్‌లో పాల్గొంటున్నారని, వారికి ఉచిత భోజన, వసతి సౌకర్యాలతో పాటు క్రీడా వేదికలకు చేరుకోవడానికి ఉచిత రవాణా ఏర్పాట్లు చేసినట్లు నిర్వాహకులు పేర్కొన్నారు.

 ఈ కార్యక్రమంలో కాస్మోపాలిటన్ క్లబ్ అధ్యక్షులు & టోర్నమెంట్ కమిటీ ఛైర్మన్ సిహెచ్. రామభద్ర రాజు, టోర్నమెంట్ కమిటీ ఛైర్మన్ యు. కృష్ణ ప్రసాద్, వైస్ ఛైర్మన్ టి. కృష్ణ బాబు, క్లబ్ కార్యదర్శి & కో-ఆర్డినేటర్ భుపతిరాజు సుబ్బరాజు, ఉపాధ్యక్షులు వి. రమేష్, టోర్నమెంట్ కార్యదర్శి యు.ఆర్.పి.ఆర్. వర్మ తదితరులు ఉన్నారు.