విజన్ ఆఫ్ రామాయణ స్పెషల్ వీడియో విడుదల.. మైండ్ బ్లాకింగ్ మేకింగ్ విజువల్స్‌తో రణ్ బీర్, సాయిపల్లవిల హంగామా
సూర్య ఎంటర్‌టైన్‌మెంట్ డెస్క్: భారతీయ చిత్రసీమలోనే కాకుండా అంతర్జాతీయ స్థాయిలో అత్యంత ఆసక్తిగా ఎదురుచూస్తున్న దృశ్యకావ్యం రామాయణ సినిమాపై మేకర్స్ కీలక అప్‌డేట్ ఇచ్చారు. బాలీవుడ్ స్టార్ హీరో రణ్‌బీర్ కపూర్ శ్రీరాముడిగా, నాచురల్ బ్యూటీ సాయిపల్లవి సీతగా నటిస్తున్న ఈ పౌరాణిక చిత్రాన్ని ప్రతిష్టాత్మక దర్శకుడు నితీశ్ తివారి అద్భుతమైన విజువల్ ప్రమాణాలతో తెరకెక్కిస్తున్నారు. రెండు భాగాలుగా ప్రేక్షకుల ముందుకు రానున్న ఈ భారీ ప్రాజెక్ట్ మొదటి భాగానికి సంబంధించిన షూటింగ్ పనులు ఇప్పటికే పూర్తయ్యాయి. ప్రమోషన్ల వేగాన్ని పెంచిన చిత్ర బృందం తాజాగా విజన్ ఆఫ్ రామాయణ పేరిట ఓ ప్రత్యేక వీడియోను సోషల్ మీడియా వేదికగా విడుదల చేసింది.
విడుదలైన ఈ ప్రత్యేక విజన్ ఆఫ్ రామాయణ వీడియో ప్రేక్షకులను, సినీ ప్రియులను ఎంతగానో ఆకట్టుకుంటోంది. ఈ వీడియోలో రామాయణ మూవీ కోసం వేసిన భారీ సెట్లు, కళ్ళు చెదిరే ప్రొడక్షన్ డిజైన్, ఆకట్టుకునే మేకింగ్ విజువల్స్ చూపించి సినిమాపై ఉన్న అంచనాలను మరో స్థాయికి తీసుకెళ్లారు. శతాబ్దాల నాటి పౌరాణిక వాతావరణాన్ని కళ్ళకు కట్టినట్లు చూపించేందుకు చిత్ర యూనిట్ పడిన శ్రమ, ప్రతి ఫ్రేమ్‌లో కనిపించే రిచ్ నెస్ ప్రతి ఒక్కరినీ మైమరిపిస్తోంది.
ఈ ప్రతిష్టాత్మక చిత్రంలో కన్నడ రాకింగ్ స్టార్, కేజీఎఫ్ ఫేమ్ యశ్ లంకేశ్వరుడు రావణాసురుడి పాత్రలో కనిపిస్తుండటంతో ఈ సినిమాపై ప్రపంచవ్యాప్తంగా అపారమైన క్రేజ్ ఏర్పడింది. ఇప్పటికే ఈ చిత్రం నుంచి విడుదలైన పాటలు, ప్రమోషనల్ కంటెంట్‌కు ప్రేక్షకుల నుంచి అపూర్వ ఆదరణ లభించగా, ఇప్పుడు వచ్చిన మేకింగ్ వీడియో సినిమాపై ఉన్న హైప్‌ను మరింత పెంచేసింది. గ్లోబల్ స్థాయిలో ప్రేక్షకులను అలరించేందుకు అత్యున్నత సాంకేతికతతో ఈ చిత్రాన్ని నిర్మిస్తున్నారు.
వచ్చేనెల 5న మొదటి భాగం ప్రపంచవ్యాప్తంగా చాలా గ్రాండ్‌గా థియేటర్లలో విడుదల కానున్న నేపథ్యంలో సినీ వర్గాల్లో తీవ్ర ఉత్కంఠ నెలకొంది. పౌరాణిక ఇతిహాసాన్ని ఆధునిక సాంకేతిక పరిజ్ఞానంతో వెండితెరపై ఆవిష్కరిస్తున్న తీరును చూసిన ప్రేక్షకులు ప్రశంసల వర్షం కురిపిస్తున్నారు. రామాయణ మొదటి భాగం బాక్సాఫీస్ వద్ద సరికొత్త రికార్డులను సృష్టించడం ఖాయమని ట్రేడ్ విశ్లేషకులు ధీమా వ్యక్తం చేస్తున్నారు.
