భారీ వర్షాల నేపథ్యంలో అండర్ బ్రిడ్జిల వద్ద అప్రమత్తంగా ఉండాలి

నెల్లూరు, మేజర్ న్యూస్ :   నెల్లూరు నగరవ్యాప్తంగా భారీ వర్షాలు కురుస్తున్న నేపథ్యంలో నగరపాలక సంస్థ కమిషనర్ వై.ఓ. నందన్ శుక్రవారం మాగుంట లేఔట్ అండర్ బ్రిడ్జి ప్రాంతాన్ని అధికారులతో కలిసి పరిశీలించారు. వర్షాల కారణంగా అండర్ బ్రిడ్జిల వద్ద వరద నీరు నిలిచిపోయి వాహనాల రాకపోకలకు అంతరాయం కలగకుండా ముందస్తు జాగ్రత్తలు తీసుకోవాలని సిబ్బందిని ఆదేశించారు. నగరంలోని అండర్ బ్రిడ్జిల వద్ద చేరే వర్షపు నీటిని ఎప్పటికప్పుడు తొలగించేందుకు అవసరమైన చర్యలు చేపట్టాలని అధికారులకు సూచించారు. వర్షాలు కురుస్తున్న సమయంలో నిరంతరం అప్రమత్తంగా ఉంటూ, మోటార్ల సహాయంతో నీటిని తొలగించాలని స్పష్టం చేశారు. నగరవ్యాప్తంగా అన్ని అండర్ బ్రిడ్జిల వద్ద ప్రత్యేక దృష్టి సారించాలని, వర్షపు నీరు నిల్వ ఉండటం వల్ల వాహనదారులు ఇబ్బందులు పడకుండా చూడాలని కమిషనర్ ఆదేశించారు. అలాగే నగరపాలక సంస్థ పరిధిలోని అన్ని డివిజన్లలో రోడ్లపై నీరు నిల్వ ఉండకుండా, సమీపంలోని డ్రైనేజీ కాలువల ద్వారా వరద నీరు సాఫీగా ప్రవహించేలా చర్యలు తీసుకోవాలని అధికారులకు సూచించారు. భారీ వర్షాల సమయంలో ప్రజలకు, వాహనదారులకు ఎలాంటి ఇబ్బందులు కలగకుండా సంబంధిత సిబ్బంది నిరంతరం పర్యవేక్షణ చేపట్టాలని కమిషనర్ పేర్కొన్నారు.