బాణసంచా నిబంధనలు అతిక్రమిస్తే కఠిన చర్యలు: సీఐ వాసునాయుడు

​గాజువాక, సూర్య : దీపావళి పండుగ సందర్భంగా బాణసంచా నిల్వలు, విక్రయాల్లో నిబంధనలు ఉల్లంఘిస్తే చట్టపరంగా కఠిన చర్యలు తీసుకుంటామని గాజువాక సీఐ చింతా వాసునాయుడు ఒక ప్రకటనలో హెచ్చరించారు. వ్యాపారులు జీఎస్టీతో పాటు విద్యుత్, అగ్నిమాపక, జీవీఎంసీ విభాగాల నుంచి ఎన్ఓసీ తప్పనిసరిగా పొందాలని, కేవలం ‘గ్రీన్ క్రాకర్స్’ మాత్రమే విక్రయించాలని స్పష్టం చేశారు. ఆసుపత్రులు, విద్యాసంస్థలకు దూరంగా దుకాణాలు ఏర్పాటు చేసి తగిన అగ్నిమాపక జాగ్రత్తలు పాటించాలని, 18 ఏళ్లలోపు వారికి టపాసులు అమ్మకూడదని ఆదేశించారు. పండుగ రోజున రాత్రి 8 నుంచి 10 గంటల వరకు మాత్రమే టపాసులు కాల్చేందుకు అనుమతి ఉందని, బహిరంగ ప్రదర్శనలకు వారం రోజుల ముందే అనుమతి తీసుకోవాలని సూచించారు. గాజువాక పరిసరాల్లో ఎవరైనా అనధికారికంగా బాణసంచా నిల్వ చేసినట్లు తెలిస్తే వెంటనే డయల్ 100, 112 లేదా గాజువాక సీఐ ఫోన్ నంబరు 9440796014కు సమాచారం ఇవ్వాలని కోరారు. సమాచారం అందించిన వారి వివరాలు పూర్తిగా గోప్యంగా ఉంచుతామని, అక్రమ నిల్వదారులపై కఠిన చర్యలు తీసుకుంటామని సీఐ తెలిపారు.