బాల న్యాయ వ్యవస్థపై పోలీసులకు అవగాహన

విజయవాడ క్రైం,  మేజర్ న్యూస్ : బాలల కేసుల్లో పోలీసులు అనుసరించాల్సిన చట్టాలు, నిబంధనలపై స్పష్టమైన అవగాహన కలిగి ఉండాలని ఎన్.టి.ఆర్. జిల్లా పోలీస్ కమిషనర్ ఎస్.వి.రాజశేఖర బాబు సూచించారు. పోలీస్ కమిషనర్ కార్యాలయంలో అడ్మిన్ డీసీపీ కె.జి.వి.సరితతో కలిసి ప్రాజెక్ట్ రెస్క్యూ ఫౌండేషన్ సౌజన్యంతో రూపొందించిన బాల న్యాయ వ్యవస్థ, పిల్లల సంరక్షణ–రక్షణ చట్టం, నిబంధనలపై అవగాహన పోస్టర్‌ను ఆయన ఆవిష్కరించారు. 18 ఏళ్లలోపు బాలబాలికల కేసుల్లో పోలీసు అధికారులు, సిబ్బంది బాధ్యతాయుతంగా వ్యవహరించాలని సూచించారు. పోలీస్ కమిషనరేట్ పరిధిలోని అధికారులకు ఇదే అంశంపై అవగాహన కల్పించేందుకు ఆన్‌లైన్ సమావేశం నిర్వహించనున్నట్లు తెలిపారు. పిల్లల హక్కుల పరిరక్షణకు, వారికి న్యాయం, పునరావాసం కల్పించేందుకు పోలీస్ శాఖ కట్టుబడి ఉందన్నారు. అత్యవసర సహాయం కోసం 100 లేదా బాలల సహాయవాణి 1098కు ఫోన్ చేయాలని సూచించారు. కార్యక్రమంలో ప్రాజెక్ట్ రెస్క్యూ ఫౌండేషన్‌కు చెందిన డా. మాథ్యూ కె. డానియల్ తదితరులు పాల్గొన్నారు.

✍️ ప్రేమ్ రాజ్, విజయవాడ.