వినాయక నిమజ్జన ఏర్పాట్లను మరింత విస్తృతం చేయాలి : వీఎంసీ కమిషనర్ ధ్యానచంద్ర

విజయవాడ కార్పొరేషన్, సెప్టెంబరు 21, మేజర్ న్యూస్ : వినాయక నిమజ్జన ఏర్పాట్లను మరింత విస్తృతం చేయాలని విజయవాడ నగరపాలక సంస్థ కమిషనర్ ధ్యానచంద్ర అధికారులను ఆదేశించారు. సోమవారం వన్‌టౌన్‌ సీతమ్మవారి పాదాల వద్ద జరుగుతున్న వినాయక విగ్రహాల నిమజ్జన ఏర్పాట్లను ఆయన క్షేత్రస్థాయిలో పరిశీలించారు. నిమజ్జనానికి చివరి రోజులు కావడంతో నగరంలోని వివిధ ప్రాంతాల నుంచి పెద్ద సంఖ్యలో వినాయక విగ్రహాలు తరలివచ్చే అవకాశం ఉన్నందున అందుకు అనుగుణంగా ముందస్తు ఏర్పాట్లు చేపట్టాలని సూచించారు. ముఖ్యంగా పూజా సామగ్రి, వ్యర్థాలను విగ్రహాల నుంచి వేరు చేసి సేకరించే పారిశుద్ధ్య సిబ్బంది సంఖ్యను పెంచాలని, ఎప్పటికప్పుడు వ్యర్థాలను తొలగించేలా చర్యలు తీసుకోవాలని ఆదేశించారు. నిమజ్జన ప్రక్రియ ఎలాంటి ఇబ్బందులు లేకుండా వేగంగా పూర్తయ్యేలా అన్ని శాఖల అధికారులు సమన్వయంతో పనిచేయాలని సూచించారు. నిమజ్జనానికి వచ్చే భక్తుల కోసం నగరపాలక సంస్థ ఏర్పాటు చేసిన తాగునీరు, వైద్య శిబిరాల్లో ఎలాంటి లోటుపాట్లు లేకుండా చూడాలని ఆదేశించారు. ఈ పర్యటనలో చీఫ్‌ ఇంజనీర్‌ పి. సత్యకుమారి, చీఫ్‌ మెడికల్‌ హెల్త్‌ ఆఫీసర్‌ డాక్టర్‌ సి.హెచ్. నిర్మల గ్లోరీ, ఎగ్జిక్యూటివ్‌ ఇంజనీర్‌ జె. శ్రీనివాస్, సిబ్బంది పాల్గొన్నారు.