అర్ణబ్ తుఫాన్ నేపథ్యంలో అనకాపల్లిలో ఎస్డీపీఓ హై అలర్ట్ వరద ప్రభావిత గ్రామాల్లో పరిశీలన.

ముందస్తు చర్యలు ముమ్మరం.
అర్ణబ్ తుఫాన్ నేపథ్యంలో అనకాపల్లి జిల్లా ఎస్పీ తుహిన్ సిన్హా ఆదేశాలు తో, ఎస్డీపీఓ అనకాపల్లి పి.వి.వి. నరసింహారావు మంగళవారం తుఫాన్ ప్రభావిత ప్రాంతాల్లో పర్యటించారు. ఎస్డీపీఓ, సీఐ జి. అశోక్ కుమార్, ఎస్ఐ జి. రవి కుమార్, సిబ్బందితో కలిసి గత ఏడాది భారీ వరదలకు గురై రహదారులు తెగిపోయిన వెంకుపాలెం, కుంచంగి గ్రామాలను సందర్శించి, గ్రామస్తులతో మాట్లాడి సంసిద్ధతను పరిశీలించారు. అనంతరం కొప్పాక గ్రామం వద్ద జాతీయ రహదారి పై ఉన్న ఏలేరు కాలువను పరిశీలించారు. జాతీయ రహదారిపై నీరు నిలిచిపోకుండా ఉండేందుకు జీవీఎంసీ సహకారంతో నీటి ప్రవాహానికి ప్రత్యామ్నాయ ఏర్పాట్లు చేయించారు. ఈ సందర్భంగా ప్రజలకు పోలీసులు పలు జాగ్రత్తలు సూచించారు. ప్రజలు అప్రమత్తంగా ఉండాలి, వాతావరణ శాఖ అధికారిక హెచ్చరికలను ఎప్పటికప్పుడు గమనించాలి. సోషల్ మీడియాలో పుకార్లను నమ్మవద్దు. లోతట్టు ప్రాంతాలు, పూరి గుడిసెలు, బలహీనమైన ఇళ్లలో ఉన్నవారు సురక్షిత ప్రాంతాలకు / పునరావాస కేంద్రాలకు తరలి వెళ్ళాలి. మత్స్యకారులు సముద్రంలోకి వేటకు వెళ్లరాదు, పడవలు, వలలను సురక్షిత ప్రదేశంలో ఉంచుకోవాలి. బలమైన గాలులు వీచే సమయంలో పాత భవనాలు, విద్యుత్ స్తంభాలు, చెట్ల కింద ఉండరాదు. త్రాగునీరు, మందులు, టార్చ్ లైట్, చార్జ్ చేసిన మొబైల్ ఫోన్లు, ముఖ్యమైన పత్రాలతో అత్యవసర కిట్ సిద్ధంగా ఉంచుకోవాలి. అత్యవసర పరిస్థితుల్లో 100 / 112 కు డయల్ చేయాలి లేదా స్థానిక పోలీస్ / రెవెన్యూ అధికారులకు సమాచారం ఇవ్వాలి. తుఫాన్ పై వాట్సాప్ గ్రూపుల్లో తప్పుడు వార్తలు ప్రచారం చేస్తే కఠిన చర్యలు ఉంటాయి. ప్రస్తుతం పరిస్థితి ప్రశాంతంగా ఉందని, పోలీసులు నిరంతరం పర్యవేక్షిస్తున్నారని ఎస్డీపీఓ తెలిపారు. ఈ పర్యటనలో ఎస్డీపీఓ అనకాపల్లి పి.వి.వి. నరసింహారావు, సీఐ జి. అశోక్ కుమార్, ఎస్ఐ జి. రవి కుమార్, సిబ్బంది పాల్గొన్నారు.