అమరావతిలో నారా లోకేష్‌తో చిన్న శ్రీను, సిరమ్మ భేటీ , విజయనగరం జిల్లా పార్టీ పరిస్థితులపై చర్చ.
విజయనగరం అక్టోబర్ 1, మేజర్ న్యూస్:
విజయనగరం జిల్లాలో పార్టీ బలోపేతం, రానున్న స్థానిక సంస్థల ఎన్నికల్లో విజయమే లక్ష్యంగా తెలుగుదేశం పార్టీ నేతలు ముందుకు సాగుతున్నారు. ఇందులో భాగంగా ఉమ్మడి విజయనగరం జిల్లా పరిషత్ మాజీ చైర్‌పర్సన్, తెలుగుదేశం పార్టీ నేత మజ్జి శ్రీనివాసరావు (చిన్న శ్రీను), ఆయన కుమార్తె, తెలుగుదేశం పార్టీ యువ నాయకురాలు, ‘చిన్న శ్రీను సోల్జర్స్’ అధ్యక్షురాలు సిరమ్మ గురువారం సాయంత్రం అమరావతిలో రాష్ట్ర ఐటీ, విద్యాశాఖ మంత్రి, తెలుగుదేశం పార్టీ జాతీయ ప్రధాన కార్యదర్శి నారా లోకేష్‌ను మర్యాదపూర్వకంగా కలిశారు.
ఈ సందర్భంగా జిల్లాలో పార్టీ పరిస్థితులు, సంస్థాగత అంశాలు, భవిష్యత్ కార్యాచరణపై నారా లోకేష్‌తో వారు చర్చించారు. రానున్న స్థానిక సంస్థల ఎన్నికలను దృష్టిలో ఉంచుకుని పార్టీ శ్రేణులు సమన్వయంతో పనిచేయాలని సూచించారు. కూటమి అభ్యర్థుల విజయానికి కృషి చేయడంతో పాటు క్షేత్రస్థాయిలో పార్టీని మరింత బలోపేతం చేయాలని నారా లోకేష్ సూచించినట్లు తెలిపారు.
జిల్లాలో పార్టీకి సంబంధించిన అంశాలపై జరిగిన ఈ భేటీ ప్రాధాన్యం సంతరించుకుంది. పార్టీ శ్రేణులను సమన్వయం చేసుకుంటూ రానున్న ఎన్నికల్లో కూటమి అభ్యర్థుల విజయానికి కృషి చేస్తామని చిన్న శ్రీను, సిరమ్మ తెలిపారు.
