ఆక్వా రైతులకు విద్యుత్‌ భరోసా

రూ.55 కోట్లతో 220/33 కేవీ సబ్‌స్టేషన్‌ ప్రారంభం

యూనిట్‌ విద్యుత్‌ రూ.1.50కే సబ్సిడీపై సరఫరా

ఆక్వా విద్యుత్‌ రాయితీకి రూ.1,200 కోట్లు ఖర్చు

రాష్ట్రవ్యాప్తంగా రూ.6 వేల కోట్లతో సబ్‌స్టేషన్ల నిర్మాణం

ఎట్టి పరిస్థితుల్లోనూ ఆక్వా విద్యుత్‌ సరఫరా నిలిపేది లేదు

 - మంత్రి గొట్టిపాటి రవికుమార్‌

సూర్య, స్టేట్  బ్యూరో : 

పశ్చిమగోదావరి జిల్లాలో ఆక్వా రైతులకు నాణ్యమైన విద్యుత్‌ అందించేందుకు కూటమి ప్రభుత్వం ప్రత్యేక చర్యలు చేపడుతోందని రాష్ట్ర విద్యుత్‌ శాఖ మంత్రి గొట్టిపాటి రవికుమార్‌ తెలిపారు. గోపవరంలో రూ.55 కోట్లతో నిర్మించిన 220/33 కేవీ సబ్‌స్టేషన్‌ను సోమవారం ఆయన ప్రారంభించారు. ఈ కార్యక్రమంలో రఘురామకృష్ణంరాజు, కామినేని శ్రీనివాస్‌, జయమంగళ వెంకటరమణ పాల్గొన్నారు.

జిల్లాలో ఆక్వా సాగు విస్తరిస్తున్న నేపథ్యంలో రైతులకు నిరంతరాయంగా నాణ్యమైన విద్యుత్‌ అందించాలనే ఉద్దేశంతో గోపవరం సబ్‌స్టేషన్‌ను నిర్మించినట్లు మంత్రి తెలిపారు. ఆక్వా రైతులకు యూనిట్‌ విద్యుత్‌ను కేవలం రూ.1.50కే సబ్సిడీపై కూటమి ప్రభుత్వం అందిస్తోందన్నారు. ఆక్వా రైతులకు రాయితీపై విద్యుత్‌ అందించేందుకు ప్రభుత్వం రూ.1,200 కోట్లు ఖర్చు చేస్తోందని పేర్కొన్నారు. జోన్లతో సంబంధం లేకుండా ఆక్వా రైతులందరికీ విద్యుత్‌ రాయితీ అందిస్తున్నామని చెప్పారు.

రాష్ట్రవ్యాప్తంగా విద్యుత్‌ మౌలిక సదుపాయాలను మరింత బలోపేతం చేసేందుకు రూ.6 వేల కోట్లతో సబ్‌స్టేషన్ల నిర్మాణం చేపడుతున్నట్లు మంత్రి తెలిపారు. వైసీపీ ప్రభుత్వం అధికారంలో ఉన్న సమయంలో ఒక్క సబ్‌స్టేషన్‌ కూడా నిర్మించలేదని విమర్శించారు. జగన్‌రెడ్డి ఐదేళ్ల పాలనలో విద్యుత్‌ శాఖను 20 ఏళ్లు వెనక్కి తీసుకెళ్లారని ఆరోపించారు. అప్పట్లో ప్రతి ఆరు నెలలకు ఏదో ఒక రూపంలో విద్యుత్‌ చార్జీలు పెంచారని అన్నారు.

కూటమి ప్రభుత్వం అధికారంలోకి వచ్చిన తర్వాత ఒక్క రూపాయి కూడా విద్యుత్‌ చార్జీలు పెంచకుండా ట్రూడ్‌డౌన్‌ చేశామని మంత్రి తెలిపారు. ఎల్‌నినో ప్రభావంతో విద్యుత్‌ డిమాండ్‌ గణనీయంగా పెరిగినప్పటికీ, డిమాండ్‌కు అనుగుణంగా విద్యుత్‌ ఉత్పత్తిని పెంచామని చెప్పారు. పీక్‌ అవర్స్‌లో అవసరమైతే తక్కువ ధరకే బహిరంగ మార్కెట్‌ నుంచి విద్యుత్‌ కొనుగోలు చేస్తున్నామని తెలిపారు.

ఆక్వా రైతుల ప్రయోజనాలను దృష్టిలో పెట్టుకుని నిరంతరాయ విద్యుత్‌ సరఫరాకు చర్యలు తీసుకుంటున్నామని మంత్రి గొట్టిపాటి రవికుమార్‌ స్పష్టం చేశారు. ఎట్టి పరిస్థితుల్లోనూ ఆక్వా రైతులకు విద్యుత్‌ సరఫరా నిలిపే ప్రసక్తే లేదని ఆయన తెలిపారు.