ఆధ్యాత్మిక పర్యాటక అభివృద్ధికి కేంద్రం పెద్దపీట బిజెపి నేత గాలి హరిప్రసాద్

వేంపల్లె మేజర్ న్యూస్:
భారత దేశంలోని ఆధ్యాత్మిక, పుణ్యక్షేత్రాలు, చారిత్రక వారసత్వ ప్రాంతాలను ఆధునిక పర్యాటక కేంద్రాలుగా అభివృద్ధి చేసే లక్ష్యంతో కేంద్ర ప్రభుత్వం ఆ రంగానికి పెద్దపీట వేస్తోందని బిజెపి జిల్లా అధికార ప్రతినిధి గాలి హరిప్రసాద్ అన్నారు. గురువారం విలేకరులతో ఆయన మాట్లాడుతూ కేంద్రంలోని మోడీ ప్రభుత్వం ఆధ్యాత్మిక పర్యాటక రంగాన్ని విశేష ప్రాధాన్యత కల్పిస్తూ ప్రసాద్ పథకాన్ని అమలు చేస్తోందన్నారు. 2014-15లో ప్రారంభమైన ఆ పథకం ద్వారా మెరుగైన సౌకర్యాలు, పరిశుభ్రత, బధ్రత, రహదారి, చివరి మైలు కనెక్టివిటీ, పార్కింగ్, తాగునీరు, సమాచార కేంద్రాలు, నిఘా కెమెరాలు తదితర మౌలిక వసతులు అభివృద్ధి చేస్తున్నట్లు తెలిపారు. ఆ పథకం కింద 54 ప్రాజెక్టులకు రూ. 1726 కోట్లు ఆమోదం లభించిందన్నారు. రాష్ట్రంలోని అమరావతి, శ్రీశైలం, సింహాచలం ఆధ్యాత్మిక ప్రాంతాల్లో ప్రాజెక్టులు చేపట్టగా.. అన్నవరం ఆలయ పట్టణంలో యాత్రికుల సౌకర్యాల అభివృద్ధికీ రూ. 25.33 కోట్లు మంజురైనట్లు వెల్లడించారు. ఆధ్యాత్మిక సంపదను ఆధునిక పర్యాటక మౌలిక వసతులతో అనుసంధానం చేయడం ద్వారా వారసత్వ పరిరక్షణ, పర్యాటక అభివృద్ధి, స్థానిక ఉపాధి మెరుగు పరిచేందుకు దోహద పడుతాయని తెలిపారు. ఈ కార్యక్రమంలో బిజెపి నాయకులు పుష్పలత, రంగారెడ్డి, శివకృష్ణ, సురేష్, దశరథ తదితరులు పాల్గొన్నారు.

గండికోట షేక్ ఖదీర్, వేంపల్లె.
వైఎస్ఆర్ కడప జిల్లా.