9వ మైలులో పోలీసుల మెరుపు దాడులు..!

జలదంకి, మేజర్ న్యూస్ : జలదంకి మండలంలోని 9వ మైలు గ్రామంలో పోలీసులు కార్డన్ & సెర్చ్ ఆపరేషన్ నిర్వహించారు. కలిగిరి సీఐ పి. సుబ్బారావు పర్యవేక్షణలో జలదంకి ఎస్సై వీరేంద్రబాబు తన సిబ్బందితో కలిసి గ్రామంలోని పలు ప్రాంతాల్లో విస్తృతంగా తనిఖీలు చేపట్టారు.
గ్రామంలో విస్తృత తనిఖీలు.. భద్రతపై ప్రత్యేక దృష్టి..
కార్డన్ & సెర్చ్‌లో భాగంగా గ్రామంలోని వివిధ ప్రాంతాలను పోలీసులు క్షుణ్ణంగా పరిశీలించారు. ప్రజల భద్రత, శాంతిభద్రతల పరిరక్షణ లక్ష్యంగా ఈ తనిఖీలు నిర్వహించారు. ఎలాంటి అవాంఛనీయ సంఘటనలు చోటుచేసుకోకుండా ముందస్తు భద్రతా చర్యల్లో భాగంగా పోలీసులు అప్రమత్తంగా వ్యవహరించారు.
హెల్మెట్ లేకుండా వాహనం నడిపితే ప్రమాదమే.. నిబంధనలు పాటించాలి.
ఈ సందర్భంగా కలిగిరి సీఐ పి. సుబ్బారావు మాట్లాడుతూ రోడ్డు ప్రమాదాల నివారణ ప్రతి ఒక్కరి బాధ్యత అని పేర్కొన్నారు. వాహనదారులు తప్పనిసరిగా ట్రాఫిక్ నిబంధనలు పాటించాలని, ద్విచక్ర వాహనదారులు హెల్మెట్ ధరించి ప్రయాణించాలని సూచించారు. ప్రాణాల రక్షణకు రహదారి భద్రతా నియమాలు ఎంతో ముఖ్యమని ప్రజలకు అవగాహన కల్పించారు. ఈ కార్యక్రమంలో కలిగిరి ఎస్సై సయ్యద్ లతీఫున్నిసా, వింజమూరు ఎస్సై ఉమామహేశ్వరరావు, కలిగిరి సర్కిల్ పోలీస్ సిబ్బంది పాల్గొన్నారు.