34% బీసీ రిజర్వేషన్లకు కట్టుబడి ఉన్నాం: మంత్రి నారా లోకేష్ కీలక వ్యాఖ్యలు

అమరావతి, సూర్య ప్రతినిధి :స్థానిక సంస్థల ఎన్నికల్లో బీసీలకు 34 శాతం రిజర్వేషన్లు కల్పించేందుకు తమ ప్రభుత్వం పూర్తిగా కట్టుబడి ఉందని రాష్ట్ర విద్యా, ఐటీ శాఖ మంత్రి నారా లోకేష్ స్పష్టం చేశారు. ఈ అంశంపై వైఎస్సార్‌సీపీ నాయకులు అవగాహన రాహిత్యంతో వ్యవహరిస్తున్నారని మండిపడ్డారు.

రిజర్వేషన్ల ప్రక్రియ ఖరారు కాకుండా, అసలు ఏ స్థానం ఏ వర్గానికి కేటాయించారో స్పష్టత లేకుండానే వైసీపీ నెల్లూరు మేయర్ అభ్యర్థిని ఏ ప్రాతిపదికన ప్రకటించిందని ఆయన ప్రశ్నించారు. తెలుగుదేశం పార్టీకి బీసీలే నిజమైన వెన్నెముక అని పేర్కొన్న మంత్రి, రిజర్వేషన్ల అంశంపై సుప్రీంకోర్టులో జరుగుతున్న విచారణ ఫలితం రేపు వెలువడే అవకాశం ఉందన్నారు.

సుప్రీంకోర్టు తుది నిర్ణయం వెలువడిన వెంటనే స్థానిక సంస్థల ఎన్నికల షెడ్యూల్ విడుదలయ్యే అవకాశం ఉందని, అక్టోబర్‌లోనే ఎన్నికలు నిర్వహించేందుకు ప్రభుత్వం సిద్ధంగా ఉందనే సూచనలు ఇచ్చారు.