108 అంబులెన్స్‌లో ప్రసవం.. తల్లి, బిడ్డ క్షేమం

మార్టూరు, మేజర్ న్యూస్:

పురిటి నొప్పులతో ఆసుపత్రికి తరలిస్తుండగా ఓ గర్భిణి 108 అంబులెన్స్‌లోనే పండంటి మగబిడ్డకు జన్మనిచ్చిన ఘటన శుక్రవారం చోటుచేసుకుంది. సకాలంలో స్పందించిన 108 సిబ్బంది తల్లీబిడ్డకు సురక్షితంగా ప్రసవం చేయడంతో ఇద్దరూ క్షేమంగా ఉన్నారు. యద్దనపూడి మండలం యనమదల గ్రామానికి చెందిన గుర్రపుశాల విష్ణుప్రియకు పురిటి నొప్పులు రావడంతో కుటుంబ సభ్యులు 108 అంబులెన్స్‌కు సమాచారం అందించారు. దీంతో అక్కడికి చేరుకున్న అంబులెన్స్ సిబ్బంది ఆమెను చిలకలూరిపేట ఆసుపత్రికి తరలిస్తుండగా మార్గమధ్యంలో పురిటి నొప్పులు తీవ్రతరమయ్యాయి. పరిస్థితిని గమనించిన 108 ఎమర్జెన్సీ మెడికల్ టెక్నీషియన్ ఆర్. ప్రసాద్ రావు, పైలట్ రవిచంద్ర సహాయంతో అంబులెన్స్‌లోని డెలివరీ కిట్‌ను ఉపయోగించి సురక్షితంగా ప్రసవం చేశారు. విష్ణుప్రియ పండంటి మగబిడ్డకు జన్మనిచ్చింది. అనంతరం తల్లీబిడ్డకు అవసరమైన వైద్యపరమైన ప్రాథమిక పరిచర్యలు అందించి, సురక్షితంగా చిలకలూరిపేట ఆసుపత్రికి తరలించారు. అత్యవసర సమయంలో సమయస్ఫూర్తితో వ్యవహరించి తల్లీబిడ్డల క్షేమానికి కృషి చేసిన 108 సిబ్బందిని యద్దనపూడి ప్రాథమిక ఆరోగ్య కేంద్రం వైద్యాధికారి శ్రీహర్షతో పాటు విష్ణుప్రియ కుటుంబ సభ్యులు అభినందించారు.