విద్యార్థులకు బ్యూటీ అండ్ వెల్ నెస్ ఇంటర్న్ షిప్ శిక్షణ

రంగారెడ్డి : ఇబ్రహీంపట్నం నియోజకవర్గం బొంగుళూరు మోడల్ స్కూల్ కు చెందిన 11వ తరగతి విద్యార్థులకు  బ్యూటీ అండ్ వెల్ నెస్ ఇంటర్న్ షిప్ లో శిక్షణ ఇస్తున్నట్లు ఇబ్రహీంపట్నం ప్రశాంతి బ్యూటి సెలూన్ నిర్వహకులు తెలిపారు. విద్యార్థులకు దసరా సెలవులను సద్వినియోగం చేసుకునేలా ఈ కార్యక్రమాన్ని ప్రారంభించినట్లు వారు పేర్కొన్నారు.అక్టోబర్ 10 నుంచి ప్రారంభమైన ఈ శిక్షణ పది రోజుల పాటు కొనసాగడం జరిగిందని, ఈ కార్యక్రమంలో విద్యార్థులకు ఫేషియల్, క్లీనప్, థ్రెడింగ్, హెయిర్ కేర్, హెయిర్ స్టైలింగ్, మేకప్ తదితర అంశాల్లో ప్రత్యక్ష ప్రాక్టికల్ శిక్షణ అందించినట్లు వివరించారు. ఈ ఇంటర్న్ షిప్ కార్యక్రమాన్ని బొంగుళూరు మోడల్ స్కూల్ బ్యూటీ అండ్ వెల్ నెస్ వృత్తి విద్యా శిక్షకురాలు వకుల పర్యవేక్షణలో నిర్వహించినట్లు తెలిపారు.విద్యార్థులకు ప్రాక్టికల్ పరిజ్ఞానంతో పాటు వృత్తికి అవసరమైన నైపుణ్యాలను అందించడమే ఈ కార్యక్రమం ప్రధాన లక్ష్యమని, తరగతి గదిలో నేర్చుకున్న పాఠాలను వాస్తవ పని ప్రదేశంలో ఆచరణలో పెట్టే అవకాశంతో విద్యార్థులు వృత్తిపరమైన అనుభవాన్ని అందజేయడం జరిగిందని వెల్లడించారు. ఈ శిక్షణ ద్వారా బ్యూటీ అండ్ వెల్ నెస్ రంగంలోని పనితీరుపై అవగాహన పెంపొందించేలా ఇంటర్న్ షిప్ విద్యార్థుల్లో ఆత్మవిశ్వాసాన్ని పెంచడంతో పాటు, భవిష్యత్తులో ఉపాధి అవకాశాలను అందిపుచ్చుకోవడానికి,  స్వయం ఉపాధి దిశగా అడుగులు వేయడానికి దోహదపడుతుందని నిర్వాహకులు తెలిపారు.

---------

శేరిబాయి గణేష్, మేజర్ న్యూస్ , రంగారెడ్డి జిల్లా ప్రతినిధి