ప్రాణరక్షణే లక్ష్యం.. హెల్మెట్‌పై చైతన్యానికి యాలాల ఎస్ఐ విఠల్ రెడ్డి వినూత్న బాట
యాలాల, మేజర్ న్యూస్: రోడ్డు ప్రమాదాల్లో విలువైన ప్రాణాలను కాపాడటమే లక్ష్యంగా యాలాల ఎస్ఐ పి. విఠల్ రెడ్డి వినూత్న కార్యక్రమానికి శ్రీకారం చుట్టారు. ద్విచక్ర వాహనదారుల్లో హెల్మెట్ వినియోగంపై అవగాహన పెంపొందించేందుకు షార్ట్‌ఫిలిం రూపొందించి, సోషల్ మీడియా వేదికగా ప్రచారం చేయిస్తున్నారు. కేవలం నిబంధనలను వివరించడమే కాకుండా, ప్రజల మనసులను తాకే దృశ్యరూప సందేశం ద్వారా హెల్మెట్ ఆవశ్యకతను తెలియజేయడమే ఈ కార్యక్రమం ప్రధాన ఉద్దేశం.ద్విచక్ర వాహనదారులు హెల్మెట్ లేకుండా ప్రయాణించడం ప్రమాదకరమని, రోడ్డు ప్రమాదాల సమయంలో తలకు తీవ్ర గాయాలు కాకుండా రక్షణ కల్పించడంలో హెల్మెట్ కీలక పాత్ర పోషిస్తుందని ఈ షార్ట్‌ఫిలిం ద్వారా అవగాహన కల్పిస్తున్నారు. వాహనం నడిపే వ్యక్తితో పాటు వెనుక కూర్చున్న వారు కూడా హెల్మెట్ ధరించాలని, ట్రాఫిక్ నిబంధనలు పాటిస్తూ సురక్షిత ప్రయాణానికి ప్రాధాన్యమివ్వాలని సూచిస్తున్నారు. ఈ సందేశం ఎక్కువ మందికి చేరేలా సోషల్ మీడియాలో ప్రచారం నిర్వహిస్తున్నారు.పోలీసుల లక్ష్యం జరిమానాలు విధించడం మాత్రమే కాకుండా, ప్రమాదాలను నివారించి ప్రజల ప్రాణాలను కాపాడటమనే సందేశాన్ని ఈ కార్యక్రమం చాటిచెబుతోంది. ప్రతి ఒక్కరూ తమ కుటుంబ భద్రతను దృష్టిలో ఉంచుకుని ఇంటి నుంచి బయటకు వెళ్లే ముందు హెల్మెట్ ధరించడాన్ని అలవాటుగా మార్చుకోవాలని ఎస్ఐ పి. విఠల్ రెడ్డి సూచిస్తున్నారు. రహదారి భద్రతపై ప్రజల్లో బాధ్యతాయుతమైన ఆలోచనను పెంపొందించేందుకు ఆయన చేపట్టిన ఈ వినూత్న ప్రయత్నం ప్రాధాన్యత సంతరించుకుంది.
రిపోర్టర్: ప్రకాష్ గౌడ్, యాలాల, వికారాబాద్ జిల్లా.
