తిమ్మాయపల్లిలో పేకాట స్థావరంపై కీసర పోలీసుల దాడి.. ఐదుగురు అరెస్ట్

కీసర, మేజర్ న్యూస్: కీసర మండల పరిధిలోని తిమ్మాయపల్లి రెవెన్యూ ప్రాంతంలో నిర్వహిస్తున్న పేకాట స్థావరంపై కీసర పోలీసులు ఆదివారం ఆకస్మిక దాడి చేసి ఐదుగురు వ్యక్తులను అదుపులోకి తీసుకున్నారు. పేకాట ఆడుతున్నారన్న విశ్వసనీయ సమాచారంతో కీసర ఎస్‌ఐ నాగరాజు సిబ్బందితో కలిసి ఈ దాడి నిర్వహించారు.దాడిలో పేకాట ఆడుతున్న ఐదుగురిని అదుపులోకి తీసుకున్న పోలీసులు వారి నుంచి రూ.35 వేల నగదు, ఐదు ద్విచక్ర వాహనాలు, ఐదు సెల్‌ఫోన్లు, పేకాట ముక్కలను స్వాధీనం చేసుకున్నారు. ఈ ఘటనపై కేసు నమోదు చేసి దర్యాప్తు చేపట్టినట్లు కీసర సీఐ ఎన్. ఎలక్షన్ రెడ్డి తెలిపారు. మండల పరిధిలో పేకాట, అక్రమ జూదం వంటి చట్టవ్యతిరేక కార్యకలాపాలకు పాల్పడితే కఠిన చర్యలు తీసుకుంటామని ఆయన హెచ్చరించారు. యువత, ప్రజలు జూదానికి దూరంగా ఉండాలని, ఇలాంటి కార్యకలాపాలపై సమాచారం ఉంటే పోలీసులకు తెలియజేయాలని సూచించారు.