తెలంగాణకు కరువు సాయం ఎప్పుడు తెస్తారు?: బీజేపీ అధ్యక్షుడు రామచందర్‌రావు పాదయాత్రపై ప్రభుత్వ విప్ ఆది శ్రీనివాస్ విమర్శలు
తెలంగాణ బ్యూరో ప్రతినిధి : బీజేపీ రాష్ట్ర అధ్యక్షుడు రామచందర్‌రావు చేపట్టనున్న పాదయాత్రపై ప్రభుత్వ విప్, సీఎల్పీ మీడియా సెంటర్ ప్రతినిధి ఆది శ్రీనివాస్ విమర్శలు చేశారు. ప్రజాస్వామ్య పరిరక్షణ పేరుతో తెలంగాణలో పాదయాత్ర చేయడం కంటే, కేంద్రం నుంచి రాష్ట్రానికి రావాల్సిన నిధులు, కరువు సాయం తీసుకురావడంపై దృష్టి పెట్టాలని సూచించారు. ఎస్‌ఐఆర్‌ ప్రక్రియతో ప్రజాస్వామ్యానికి విఘాతం కలుగుతోందని ఆది శ్రీనివాస్ ఆరోపించారు. ఓట్ల తొలగింపు అంశంపై బీజేపీ నాయకులు సమాధానం చెప్పాలని డిమాండ్ చేశారు. రామచందర్‌రావు పాదయాత్ర చేయాలనుకుంటే ఢిల్లీలో ప్రధాని మోదీ నివాసం వద్ద, నాగ్‌పూర్‌లోని ఆర్‌ఎస్‌ఎస్‌ కార్యాలయం వద్ద చేపట్టాలని వ్యాఖ్యానించారు. తెలంగాణలో కరువు సాయం కింద రూ.20 వేల కోట్లు ఇవ్వాలని రాష్ట్ర ప్రభుత్వం ఇప్పటికే కేంద్రాన్ని కోరిందని తెలిపారు. కేంద్రం నుంచి నిధులు తీసుకురావడంలో రాష్ట్ర బీజేపీ నాయకులు, ఎంపీలు తమ బాధ్యతను నిర్వర్తించాలని అన్నారు. మెట్రో రైలు, రీజినల్ రింగ్ రోడ్‌ (ట్రిపుల్ ఆర్‌), బుల్లెట్ రైలు వంటి ప్రాజెక్టుల విషయంలో కేంద్రం సహకరించడం లేదని ఆరోపించారు. రాష్ట్రానికి రావాల్సిన నిధులు, ప్రాజెక్టులపై స్పష్టత తీసుకురావాలని రామచందర్‌రావును డిమాండ్ చేశారు. నవంబర్ 1 నుంచి ప్రారంభించనున్న పాదయాత్రలో రైతులు కరువు సాయంపై బీజేపీ నాయకులను నిలదీయాలని ఆది శ్రీనివాస్ పిలుపునిచ్చారు.
