తాళ్లపేటలో బతుకమ్మ వేడుకల్లో ఘర్షణ
సూర్య, మంచిర్యాల జిల్లా ప్రతినిధి : మంచిర్యాల జిల్లా దండేపల్లి మండలం తాళ్లపేటలో బతుకమ్మ సంబురాల సందర్భంగా కాంగ్రెస్ పార్టీలోని రెండు వర్గాల మధ్య తలెత్తిన వివాదం తీవ్ర ఉద్రిక్తతకు దారితీసింది. ఎమ్మెల్యే ప్రేమ్ సాగర్ రావు (పీఎస్ఆర్) వర్గీయులకు, మంత్రి వివేక్ ప్రధాన అనుచరుడు జగన్మోహన్ వర్గీయులకు మధ్య ఘర్షణ చోటుచేసుకున్నట్లు సమాచారం.
సమాచారం అందుకున్న లక్షెట్టిపేట సీఐ రమణమూర్తి సంఘటనా స్థలానికి చేరుకుని ఆందోళనకారులను చెదరగొట్టినట్లు తెలిసింది. ఈ క్రమంలో మహిళలు భయంతో పరుగులు తీయగా, కొందరు కిందపడి గాయపడినట్లు సమాచారం. సీఐ తమపై లాఠీతో దాడి చేశారని ఆరోపిస్తూ మాజీ వైస్ ఎంపీపీ ఆకుల రాజేందర్, గిరిజన మహిళా సర్పంచ్ కుర్సింగ కళావతి, ఉపసర్పంచ్ పుట్టపాక తిరుపతి నిరసనకు దిగారు.
• సీఐ సస్పెన్షన్‌కు డిమాండ్
ఈ ఘటన నేపథ్యంలో జగన్మోహన్, జీసీసీ మాజీ చైర్మన్ కొట్నాక తిరుపతి తాళ్లపేటకు చేరుకుని తమ వర్గీయులతో కలిసి రోడ్డుపై బైఠాయించి నిరసన తెలిపారు. సీఐ రమణమూర్తిని సస్పెండ్ చేయాలని డిమాండ్ చేశారు. మరోవైపు పీఎస్ఆర్ వర్గీయులు బస్టాండ్ వద్ద నినాదాలు చేయడంతో ఇరువర్గాల మధ్య మరోసారి ఘర్షణ చోటుచేసుకున్నట్లు సమాచారం.
పరిస్థితి ఉద్రిక్తంగా మారడంతో జిల్లా నలుమూలల నుంచి పోలీసులను రప్పించి భారీ బందోబస్తు ఏర్పాటు చేశారు. బతుకమ్మ వేడుకల సందర్భంగా ప్రారంభమైన వివాదం కాంగ్రెస్ పార్టీలో వర్గపోరుగా మారడం స్థానికంగా చర్చనీయాంశమైంది.
