సూర్య కథనానికి స్పందన అక్రమ నిర్మాణాలపై అధికారుల ఉక్కుపాదం

కొండాపూర్;మండల పరిధిలోని మల్కాపూర్ శివారులో హెచ్‌ఎండీఏ తుది అనుమతులు లేకుండానే ప్రైవేట్ వెంచర్లలో అక్రమ నిర్మాణాలు చేపడుతున్నారనే అంశంపై సూర్య దినపత్రికలో ఇటీవల కథనం ప్రచురితమైంది. ప్రాథమిక అనుమతులతోనే ప్లాట్ల విక్రయాలు జరపడం, నిబంధనలకు విరుద్ధంగా ప్రహరీ గోడలు నిర్మించడం వంటి అక్రమాలను సూర్య వెలుగులోకి తీసుకొచ్చింది. ఈ కథనంపై స్పందించిన పంచాయతీ అధికారులు క్షేత్రస్థాయిలో చర్యలు చేపట్టి, అనుమతులు లేకుండా నిర్మించిన ప్రహరీ గోడలను కూల్చివేశారు. పలుమార్లు హెచ్చరికలు, నోటీసులు ఇచ్చినా నిబంధనలు పాటించకపోవడంతో ఈ చర్యలు చేపట్టారు.ఈ సందర్భంగా జిల్లా పంచాయతీ అధికారి మల్లారెడ్డి మాట్లాడుతూ.. అనుమతులు లేకుండా, నిబంధనలకు విరుద్ధంగా నిర్మాణాలు చేపడితే చట్టపరమైన చర్యలు తప్పవని హెచ్చరించారు. వెంచర్ యజమానులు హెచ్‌ఎండీఏ తుది అనుమతులు పొందకుండా ప్లాట్ల విక్రయాలు చేపట్టకూడదని స్పష్టం చేశారు. నిబంధనలను అతిక్రమించి నిర్మాణాలు చేపట్టినా, అక్రమంగా ప్లాట్లు విక్రయించినా బాధ్యులపై కఠిన చర్యలు తీసుకుంటామని తెలిపారు.ఈ కార్యక్రమం లో ఎంపీఓ యాదగిరి సెక్రటరీ బలరాం పాల్గొన్నారు సూర్య దినపత్రిక కథనానికి స్పందించి అధికారులు అక్రమ నిర్మాణాలపై చర్యలు చేపట్టడంపై స్థానిక ప్రజలు హర్షం వ్యక్తం చేస్తున్నారు. ప్రజా సమస్యలను వెలుగులోకి తీసుకువచ్చి, అధికారుల దృష్టికి తీసుకెళ్లడంలో పత్రికలు కీలక పాత్ర పోషిస్తున్నాయని అభిప్రాయపడ్డారు.