సాగునీరు సాధనకై ఉద్యమించాలి

సంస్థాన్‌ నారాయణపురం మేజర్ న్యూస్ : రాచకొండ రిజర్వాయర్ సాధన కోసం రైతులు, ప్రజలను సమీకరించి ఉద్యమాన్ని ఉధృతం చేయాలని సీపీఐ జిల్లా కార్యవర్గ సభ్యులు బచ్చనగోని గాలయ్య, కె. శ్రీనివాస్ పిలుపునిచ్చారు. బుధవారం మండల కేంద్రంలో చిలివేరు అంజయ్య అధ్యక్షతన జరిగిన సీపీఐ మండల కౌన్సిల్ సమావేశంలో వారు హాజరై మాట్లాడుతూ ఈ నెల 31న సంస్థాన్‌ నారాయణపురంలో రాచకొండ రిజర్వాయర్ సాధన కోసం నిర్వహించే ధర్నాకు రైతులు, ప్రజలు పెద్ద సంఖ్యలో హాజరై మద్దతు ఇవ్వాలని కోరారు. రిజర్వాయర్ నిర్మాణంతో భూగర్భ జలాలు పెరగడంతో పాటు వేలాది ఎకరాలకు సాగునీరు అందుతుందని, ప్రాంత అభివృద్ధికి దోహదపడుతుందని పేర్కొన్నారు. శివన్నగూడెం ప్రాజెక్టు నుంచి లిఫ్ట్‌ ద్వారా సంస్థాన్‌ నారాయణపురం, చౌటుప్పల్‌ మండలాలకు సాగునీరు అందించే అంశంపై ప్రభుత్వం పునరాలోచించాలని డిమాండ్‌ చేశారు. రాచకొండ ప్రాంత సస్యశ్యామలం కోసం సీపీఐ ఆధ్వర్యంలో గతంలో రెండుసార్లు పాదయాత్రలు, నియోజకవర్గ స్థాయి సదస్సులు, సీనియర్‌ ఇంజినీర్లతో సమీక్షలు నిర్వహించినట్లు నాయకులు తెలిపారు. ప్రభుత్వం వెంటనే స్పందించి రిజర్వాయర్‌ నిర్మాణానికి అవసరమైన చర్యలు చేపట్టాలని డిమాండ్‌ చేశారు. సమావేశంలో సీపీఐ మండల కార్యదర్శి దుబ్బాక భాస్కర్, కలకొండ సంజీవ, పల్లె మల్లారెడ్డి, సుర్వి నరసింహ, దుబ్బాక సంజీవ తదితరులు పాల్గొన్నారు.