నెహ్రూ నగర్‌లో ఘనంగా సద్దుల బతుకమ్మ సంబరాలు
కొండాపూర్,మేజర్ న్యూస్ : శేరిలింగంపల్లి డివిజన్ పరిధిలోని నెహ్రూ నగర్ లో సద్దుల బతుకమ్మ సంబరాలు అంబరాన్నంటాయి. అపార్ట్ మెంట్లలోని మహిళలు, చిన్నారులు గంటల తరబడి బతుకమ్మ, కోలాట ఆడారు. తెలంగాణ సంస్కృతి సంప్రదాయాలకు అద్దం పట్టేలా పట్నంలోనూ గునుగు, తంగేడు, తీరొక్క పూలతో పెద్ద బతుకమ్మలను తయారు చేసి పల్లెలకు దీటుగా భక్తి ని చాటారు.
నెహ్రూ నగర్ లోని శ్రీ రేణుకా అపార్ట్ మెంట్ లో దుర్గామాత చిత్రపటంతో గునుగు పూలు, బంతిపూలతో పెద్ద బతుకమ్మను తయారు చేసి భక్తి పారవశ్యం చాటుకున్నారు. శేరిలింగంపల్లి నియోజకవర్గం కాంగ్రెస్ యువజన నాయకులు చింతకింది రవీందర్ గౌడ్, దేవులపల్లి శ్రీకాంత్ ఆధ్వర్యంలో బతుకమ్మ సంబరాలు ఘనంగా నిర్వహించారు.
ఈ సందర్భంగా వారు మాట్లాడుతూ ప్రకృతి ని పూజించే తెలంగాణ ఆడపడుచుల పండగ బతుకమ్మ పండగ అన్నారు. ప్రపంచంలో ప్రకృతిని ప్రేమిస్తూ పూలను పూజించే గొప్ప సంస్కృతి మనకు దక్కడం గర్వంగా ఉందన్నారు. తెలంగాణ ఆడపడుచుల ఆత్మీయతకు, ప్రకృతితో మనిషికి ఉన్న అనుబంధానికి, మన సంస్కృతి సంప్రదాయాల గొప్పతనానికి ప్రతీకగా బతుకమ్మ పండుగ నిలుస్తుందన్నారు.
మారుతున్న కాలానికి అనుగుణంగా బతుకమ్మ పండగ అంతరించిపోకుండా రాబోయే తరాలకు సైతం ఆదర్శంగా ఉండాల్సిన అవసరం ఎంతైనా ఉందన్నారు. చిన్నారులు ఉత్సాహంగా కోలాటలు ఆడి బతుకమ్మ సంబరాల్లో పాల్గొన్నారు. సద్దుల బతుకమ్మకు మహిళలు పూజలు చేసి గోపీనగర్ బతుకమ్మ‌కుంటలో నిమజ్జనం చేశారు.
