మహబూబ్ నగర్ బైపాస్ కు అనుమతులు మంజూరు చేయండి
మహబూబ్ నగర్, సూర్య బ్యూరో: మహబూబ్నగర్ పట్టణంలో రోజురోజుకూ పెరుగుతున్న ట్రాఫిక్ రద్దీని నివారించడంతో పాటు ప్రాంతీయ రవాణా వ్యవస్థను మరింత మెరుగుపరిచేందుకు బైపాస్ రోడ్డు నిర్మాణానికి పరిపాలనా అనుమతులు మంజూరు చేయాలని మహబూబ్నగర్ ఎంపీ డీకే అరుణ కేంద్ర రవాణా, జాతీయ రహదారుల శాఖ మంత్రి నితిన్ గడ్కరీని కోరారు. గురువారం హైదరాబాద్లోని నవోటెల్లో కేంద్ర మంత్రిని కలిసి ఈ మేరకు వినతిపత్రం అందజేశారు. జాతీయ రహదారుల అభివృద్ధి కార్యక్రమం కింద ఎన్హెచ్-167లోని 275/350 కిలోమీటర్ నుంచి ఎన్హెచ్-167ఎన్లోని 13/285 కిలోమీటర్ వరకు మహబూబ్నగర్ బైపాస్ రోడ్డు నిర్మాణాన్ని మంజూరు చేయాలని విజ్ఞప్తి చేశారు. ఈ బైపాస్ రోడ్డు నిర్మాణం పూర్తయితే మహబూబ్నగర్ పట్టణంలో వాహనాల రద్దీ తగ్గడంతో పాటు హైదరాబాద్, జడ్చర్ల, కర్ణాటక, రాయచూర్ ప్రాంతాల మధ్య రవాణా సౌకర్యాలు మెరుగుపడతాయని వివరించారు. ఈ రహదారి వల్ల ప్రాంతీయ పారిశ్రామిక అభివృద్ధికి ఊతం లభించడంతో పాటు రైల్వే స్టేషన్కు రవాణా అనుసంధానం మెరుగుపడుతుందని ఎంపీ పేర్కొన్నారు. ముఖ్యంగా రైతులు తమ పంటలను వివిధ మార్కెట్లకు సులభంగా తరలించేందుకు ఎంతో ప్రయోజనకరంగా ఉంటుందని తెలిపారు. అంతేకాకుండా ప్రముఖ పర్యాటక ప్రాంతమైన పిల్లలమర్రి అభివృద్ధికి, గిరిజన ప్రాంతాల ప్రజలకు మెరుగైన రవాణా సదుపాయాలు కల్పించేందుకు, అత్యవసర వైద్య సేవలను సులభంగా పొందేందుకు ఈ బైపాస్ రోడ్డు కీలకంగా మారుతుందని కేంద్ర మంత్రికి వివరించారు. మహబూబ్నగర్ జిల్లా సమగ్ర అభివృద్ధి, ప్రజల ప్రయాణ సౌకర్యాలు, ఆర్థిక పురోగతిని దృష్టిలో ఉంచుకుని బైపాస్ రోడ్డు నిర్మాణానికి త్వరితగతిన పరిపాలనా అనుమతులు మంజూరు చేయాలని కోరారు.