కొర్విచెడ్ ఘని పాఠశాలలో వెబ్ సినిమా షూటింగ్ సందడి

బషీరాబాద్, మేజర్ న్యూస్: బషీరాబాద్ మండలంలోని కొర్విచెడ్ ఘని గ్రామ పరిషత్ ప్రాథమిక పాఠశాల (ఎంపీపీఎస్) ప్రాంగణం శుక్రవారం వెబ్ సినిమా షూటింగ్‌తో సందడిగా మారింది. ‘కలర్ టీవీ విద్యార్థి’ అనే వెబ్ సినిమా చిత్రీకరణ పాఠశాల ఆవరణలో నిర్వహించడంతో విద్యార్థులు, గ్రామస్తుల్లో ఆసక్తి నెలకొంది. తెల్లవారుజామున 4 గంటల నుంచి ఉదయం 8 గంటల వరకు షూటింగ్ కొనసాగగా, ఉదయం 7 నుంచి 8 గంటల వరకు గ్రామస్తులు, విద్యార్థులకు చిత్రీకరణను ప్రత్యక్షంగా వీక్షించే అవకాశం కల్పించారు. ఈ సందర్భంగా సినిమా నిర్మాణ విధానం, కెమెరా పనితీరు, చిత్రీకరణ ప్రక్రియ గురించి విద్యార్థులకు చిత్ర బృందం అవగాహన కల్పించింది. సాధారణంగా పాఠాలు నేర్చుకునే పాఠశాల ప్రాంగణంలో సినిమా షూటింగ్ జరగడంతో విద్యార్థులు ఉత్సాహంగా తిలకించారు. ప్రభుత్వ పాఠశాలలో ఇలాంటి వినూత్న కార్యక్రమం నిర్వహించడం పట్ల ఉపాధ్యాయులు, గ్రామస్తులు హర్షం వ్యక్తం చేశారు. గ్రామ సర్పంచ్ షూటింగ్‌కు అవసరమైన సహకారం అందించి చిత్ర బృందాన్ని ప్రోత్సహించడంతో కార్యక్రమం విజయవంతంగా సాగింది.