జాతీయస్థాయి విలువిద్య పోటీలకు అల్ఫోర్స్ విద్యార్థిని ఎంపిక
సూర్య కరీంనగర్ : జాతీయస్థాయి విలువిద్య (ఆర్చరీ) పోటీలకు అల్ఫోర్స్ విద్యాసంస్థల విద్యార్థిని కూన వందన ఎంపికైంది. హకీంపేట స్పోర్ట్స్ స్కూల్‌లో నవంబర్ 3 నుంచి 5వ తేదీ వరకు నిర్వహించిన ఎస్‌జీఎఫ్‌ఐ అండర్‌-19 విభాగం విలువిద్య పోటీల్లో వందన ప్రతిభ కనబరిచి ద్వితీయ స్థానాన్ని సాధించింది. ఈ విజయంతో డిసెంబర్‌లో మహారాష్ట్రలోని అమరావతిలో నిర్వహించనున్న జాతీయస్థాయి విలువిద్య పోటీలకు అర్హత సాధించింది.చిన్ననాటి నుంచే విలువిద్యపై ఆసక్తి, పట్టుదలతో సాధన చేస్తున్న వందన తన తల్లిదండ్రుల ప్రోత్సాహం, నిరంతర కృషితో ఈ ఘనత సాధించడం అభినందనీయమని అల్ఫోర్స్ విద్యాసంస్థల చైర్మన్ డాక్టర్ వి. నరేందర్ రెడ్డి పేర్కొన్నారు. ఎస్‌జీఎఫ్‌ఐ పోటీల్లో ద్వితీయ స్థానం సాధించి జాతీయస్థాయి పోటీలకు ఎంపికైన విద్యార్థినిని ఆయన మనస్ఫూర్తిగా అభినందించారు. జాతీయస్థాయి పోటీల్లోనూ వందన ఉత్తమ ప్రతిభ కనబరిచి విజయం సాధిస్తుందని ఆశాభావం వ్యక్తం చేశారు.
