ఇందిరమ్మ ఇళ్లతోనే నిరుపేదల సొంతింటి కల సాకారం: ఎమ్మెల్యే డా.కవ్వంపల్లి సత్యనారాయణ

సూర్య - మానకొండూర్ : మండలంలోని అన్నారం గ్రామంలో ఇందిరమ్మ ఇళ్లలో దీపావళి వేడుకలు, గృహప్రవేశాల కార్యక్రమాన్ని ఘనంగా నిర్వహించారు. గ్రామ శాఖ అధ్యక్షులు రామగిరి సారయ్య ఆధ్వర్యంలో జరిగిన ఈ వేడుకలకు మానకొండూర్ ఎమ్మెల్యే, టీపీసీసీ ఎస్సీ సెల్ చైర్మన్ డాక్టర్ కవ్వంపల్లి సత్యనారాయణ ముఖ్య అతిథిగా హాజరయ్యారు.ముందుగా అన్నారం గ్రామపంచాయతీ వద్దకు చేరుకున్న ఎమ్మెల్యేకు మహిళలు మంగళహారతులతో ఘన స్వాగతం పలికారు. అనంతరం నాయకులు, మహిళలు డీజే పాటల మధ్య పెద్ద ఎత్తున ర్యాలీగా లబ్ధిదారులైన రామగిరి విజయ- ప్రకాష్ దంపతుల నివాసానికి చేరుకున్నారు. ఇంటి యజమానులు ఎమ్మెల్యేకు బూడిద గుమ్మడికాయతో దిష్టి తీసి లోపలికి ఆహ్వానించారు. ఎమ్మెల్యే కవ్వంపల్లి సత్యనారాయణ నూతనంగా నిర్మించిన ఇందిరమ్మ ఇంటిని రిబ్బన్ కట్ చేసి ప్రారంభించారు. అనంతరం ఇంట్లో జరిగిన లక్ష్మీ పూజలో పాల్గొని, లబ్ధిదారులైన దంపతులకు నూతన వస్త్రాలు అందించి శుభాకాంక్షలు తెలిపారు.ఈ సందర్భంగా ఎమ్మెల్యే డాక్టర్ కవ్వంపల్లి సత్యనారాయణ మాట్లాడుతూ.. ముఖ్యమంత్రి రేవంత్ రెడ్డి ఆదేశాల మేరకు అడిషనల్ కలెక్టర్, ఎంపీడీఓ, హౌసింగ్ కార్పొరేషన్ అధికారుల ఆధ్వర్యంలో, గ్రంథాలయ కమిటీ చైర్మన్ సత్తు మల్లేశం సమక్షంలో ఈ కార్యక్రమాన్ని నిర్వహించినట్లు పేర్కొన్నారు. గూడు లేని నిరుపేదలు లేని తెలంగాణను నిర్మించాలనే ముఖ్యమంత్రి రేవంత్ రెడ్డి కలలను సాకారం చేసేందుకే ఇందిరమ్మ ఇళ్లను మంజూరు చేస్తున్నామని అన్నారు. మానకొండూరు నియోజకవర్గంలో మొత్తం 3,500 ఇందిరమ్మ ఇళ్లను మంజూరు చేయనున్నట్లు వెల్లడించారు.
గత ప్రభుత్వం ఈ మండలంలో ఒక్కటంటే ఒక్క డబుల్ బెడ్రూమ్ ఇల్లు కూడా ఇవ్వకుండా నిరుపేదలను వంచించిందని ఎమ్మెల్యే విమర్శించారు. నిరుపేదలకు ఇల్లు, భూమి లేకుంటే వారి జీవితాలు ఎలా మారుతాయని ప్రశ్నించారు. గతంలో ఇందిరమ్మ రాజ్యం వచ్చినప్పుడే నిరుపేదలకు మూడు ఎకరాల భూములతో పాటు ఇందిరమ్మ ఇళ్లను నిర్మించి ఇచ్చారని, ఇప్పుడు ప్రజా ప్రభుత్వంలోనూ అదే సంక్షేమాన్ని కొనసాగిస్తున్నామని స్పష్టం చేశారు. నూతన ఇందిరమ్మ ఇళ్లలో దీపావళి పండుగ జరుపుకుంటున్న లబ్ధిదారుల కుటుంబాలకు అష్టైశ్వర్యాలు, ఆయురారోగ్యాలు కలగాలని ఎమ్మెల్యే డాక్టర్ కవ్వంపల్లి సత్యనారాయణ ఆకాంక్షించారు.ఈ కార్యక్రమంలో స్థానిక ప్రజాప్రతినిధులు, కాంగ్రెస్ నాయకులు, ప్రభుత్వ అధికారులు, మహిళలు గ్రామ ప్రజలు పెద్ద సంఖ్యలో పాల్గొన్నారు.