వైవిధ్యమైన కాన్సెప్ట్‌తో చాందిని చౌదరి కొత్త సినిమా.. కీలక పాత్రలో నటుడు బాబీ సింహ ఎంట్రీ
సూర్య ఎంటర్‌టైన్‌మెంట్ డెస్క్: టాలీవుడ్‌లో వైవిధ్యమైన కథలను ఎంచుకుంటూ దూసుకుపోతున్న యువ నటి చాందిని చౌదరి ప్రధాన పాత్రలో ఓ సరికొత్త సైన్స్ ఫిక్షన్ డార్క్ కామెడీ చిత్రం తెరకెక్కుతోంది. ప్రేక్షకులకు విభిన్నమైన సినిమా అనుభూతిని పంచేలా రూపొందుతున్న ఈ ప్రాజెక్ట్‌పై టాలీవుడ్ వర్గాల్లో ఇప్పటికే భారీ అంచనాలు నెలకొన్నాయి. వికాస్ దర్శకత్వంలో తెరకెక్కుతున్న ఈ సినిమాలో సుశాంత్ యాష్కీ కూడా కీలక పాత్రలో కనిపించనున్నారు. తాజాగా ఈ క్రేజీ ప్రాజెక్ట్‌లోకి ప్రముఖ విలక్షణ నటుడు బాబీ సింహ అధికారికంగా చేరారు. ఈ విషయాన్ని తెలియజేస్తూ చిత్రబృందం విడుదల చేసిన ప్రత్యేక వీడియో ప్రస్తుతం సోషల్ మీడియాలో సినీ ప్రియులను ఎంతగానో ఆకట్టుకుంటోంది.
సూపర్ హీరో కాన్సెప్ట్‌తో పాటు సైన్స్ ఫిక్షన్ అంశాలు, డార్క్ కామెడీ జోడించి ఈ సినిమాను తెరకెక్కిస్తున్నట్లు మేకర్స్ తెలిపారు. కథలోని ఆసక్తికరమైన మలుపులు, సరికొత్త వినోదాత్మక సన్నివేశాలు ప్రేక్షకులకు పూర్తి స్థాయి వినోదాన్ని అందిస్తాయని చిత్ర యూనిట్ ధీమా వ్యక్తం చేస్తోంది. విలక్షణ నటుడిగా తనకంటూ ప్రత్యేక గుర్తింపు తెచ్చుకున్న బాబీ సింహ ఈ చిత్రంలో జాయిన్ అవ్వడంతో సినిమాపై అంచనాలు మరింత పెరిగాయి. ఆయన పాత్ర చిత్రణ చాలా డిఫరెంట్‌గా ఉంటుందని, కథా గమనంలో ఈ పాత్ర అత్యంత కీలకంగా మారుతుందని సినీ వర్గాల్లో చర్చ జరుగుతోంది.
సహచారి క్రియేషన్స్ పతాకంపై సృజన గోపాల్ ఈ చిత్రాన్ని నిర్మిస్తున్నారు. నిర్మాణ విలువలతో పాటు టెక్నికల్ పరంగా కూడా ఈ సినిమా అత్యున్నత ప్రమాైకాలతో రూపొందుతున్నట్లు తెలుస్తోంది. ఈ చిత్రానికి సంబంధించిన రెగ్యులర్ షూటింగ్ డిసెంబర్ మొదటి వారంలో హైదరాబాద్‌లో ఘనంగా ప్రారంభం కానుంది. ఈ సినిమాలో జీవన్ కుమార్, అజయ్ ఘోష్ తదితరులు ఇతర ముఖ్యమైన పాత్రల్లో నటిస్తూ అలరించనున్నారు. ఈ సినిమాకు పవన్ సంగీతం అందిస్తుండగా, జితిన్ సినిమాటోగ్రాఫర్‌గా వ్యవహరిస్తున్నారు. త్వరలోనే ఈ చిత్రానికి సంబంధించిన అధికారిక టైటిల్ తో పాటు పూర్తి వివరాలను మేకర్స్ అధికారికంగా ప్రకటించనున్నారు.
Also Read: జపాన్‌లో టాలీవుడ్ లవ్లీ కపుల్ విజయ్ దేవరకొండ, రష్మిక దీపావళి వేడుకలు.. వైరల్ అవుతున్న ఫొటోలు
