జాతీయ మూల్యాంకనానికి విద్యార్థులను సిద్ధం చేయాలి ఉపాధ్యాయులకు కలెక్టర్ కోయ శ్రీహర్ష సూచన

సూర్య – పెద్దపల్లి:

జాతీయ స్థాయిలో నిర్వహించే PARAKH మూల్యాంకనంలో తెలంగాణ రాష్ట్రం ఉన్నత స్థానం సాధించేలా ఉపాధ్యాయులు సమష్టిగా కృషి చేయాలని జిల్లా కలెక్టర్ కోయ శ్రీహర్ష సూచించారు. ధర్మారం మండలం రచ్చపల్లి ప్రాథమిక పాఠశాల ప్రధానోపాధ్యాయుడు డాక్టర్ సముద్రాల వంశీ మోహనాచార్యులు రూపొందించిన PARAKH ప్రత్యేక అభ్యసన దీపికను బుధవారం కలెక్టర్ ఆవిష్కరించారు. ఈ సందర్భంగా కలెక్టర్ మాట్లాడుతూ విద్యార్థులను ముందస్తు ప్రణాళికతో జాతీయ స్థాయి మూల్యాంకనానికి సిద్ధం చేయాలని, వినూత్న బోధనా పద్ధతులతో వారి అభ్యసన సామర్థ్యాలను పెంపొందించాలని అన్నారు. గత రెండేళ్ల ప్రశ్నపత్రాలు, జాతీయ స్థాయి అభ్యసన ప్రమాణాలను పరిశీలించి 25 ముఖ్యమైన అంశాలపై వందలాది ప్రశ్నలతో ఈ అభ్యసన దీపికను రూపొందించడం అభినందనీయమన్నారు. అంతేకాకుండా ప్రధానోపాధ్యాయుడు తన సొంత నిధులతో పుస్తకాన్ని ముద్రించి విద్యార్థులకు అందించడం ప్రశంసనీయమని పేర్కొన్నారు. కార్యక్రమంలో జిల్లా విద్యాధికారి శారద, అకాడమిక్ మానిటరింగ్ ఆఫీసర్ డాక్టర్ షేక్ తదితరులు పాల్గొన్నారు.