జాతీయ బాండీ ఛాంపియన్‌షిప్‌లో తెలంగాణ జట్టు సత్తా రన్నరప్‌గా నిలిచిన తెలంగాణ.. మూడు స్వర్ణాలు, ఒక రజత పతకం కైవసం
తెలంగాణ బ్యూరో ప్రతినిధి : ఢిల్లీ ఎన్‌సీఆర్‌లోని గురుగ్రామ్ అంబియెన్స్ మాల్‌లో ఉన్న ఐస్‌కేట్ వేదికగా అక్టోబర్ 17, 18 తేదీల్లో నిర్వహించిన 8వ జాతీయ బాండీ ఛాంపియన్‌షిప్‌–2026లో తెలంగాణ జట్టు అద్భుత ప్రతిభ కనబరిచింది. బాండీ అసోసియేషన్ ఆఫ్ ఇండియా ఆధ్వర్యంలో జరిగిన ఈ పోటీల్లో తెలంగాణ జట్టు మూడు స్వర్ణాలు, ఒక రజత పతకంతో పాటు జట్టు ఛాంపియన్‌షిప్‌లో రన్నరప్ ట్రోఫీని సాధించింది.
జట్టు ఛాంపియన్‌షిప్‌లో హర్యానా రాష్ట్రం 19 పాయింట్లతో మొదటి స్థానంలో నిలవగా, తెలంగాణ 18 పాయింట్లతో రెండో స్థానాన్ని దక్కించుకుంది.
తెలంగాణ క్రీడాకారుల పతకాల వివరాలు
అండర్-10 బాలుర విభాగం: హర్యానాతో జరిగిన ఫైనల్లో 0–1 తేడాతో ఓటమి పొంది రజత పతకం సాధించింది.
అండర్-10 బాలికల విభాగం: తమిళనాడుపై 1–0 తేడాతో విజయం సాధించి స్వర్ణ పతకం గెలుచుకుంది.
అండర్-14 బాలుర విభాగం: తమిళనాడుపై 2–0 తేడాతో గెలిచి స్వర్ణ పతకం సాధించింది.
అండర్-14 బాలికల విభాగం: ఉత్తరప్రదేశ్‌తో జరిగిన పోటీలో పెనాల్టీ షూటౌట్ ద్వారా 1–0తో విజయం సాధించి స్వర్ణ పతకాన్ని కైవసం చేసుకుంది.
అత్యధిక గోల్స్ సాధించిన తెలంగాణ క్రీడాకారులు
తెలంగాణ తరఫున పి. మిథున (ఎస్ వీ ఐ ఎస్ ), జి. మోక్షిత (అర్ష స్కేటింగ్ అకాడమీ), సంజయ్ స్కృతి (గేమ్ పాయింట్, కొంపల్లి) ఛాంపియన్‌షిప్‌లో అత్యధికంగా మూడు గోల్స్ చొప్పున సాధించి ప్రతిభ కనబరిచారు. బాలుర విభాగంలో సాయి తనిష్, జతిన్ ధీర (అర్ష స్కేటింగ్ అకాడమీ) అత్యధిక గోల్స్ సాధించిన క్రీడాకారులుగా నిలిచారు.
క్రీడాకారుల కృషి, కోచ్‌ల మార్గదర్శకత్వం, సహాయక సిబ్బంది సహకారం, జట్టు యాజమాన్యం సమన్వయంతోనే ఈ విజయం సాధ్యమైందని నిర్వాహకులు తెలిపారు.
తెలంగాణకు జాతీయ స్థాయిలో గుర్తింపు తీసుకొచ్చిన క్రీడాకారులను, కోచ్‌లను, జట్టు కార్యదర్శి మహమ్మద్ నసీరుద్దీన్‌ను అభినందించారు
