బతుకమ్మ తెలంగాణ సంస్కృతి సంప్రదాయాలకు ప్రతీక: వివేకానంద నగర్‌లో వేడుకల్లో పాల్గొన్న టీపీసీసీ ఉపాధ్యక్షుడు బండి రమేష్!
సూర్య సిటీ & కల్చరల్ డెస్క్, కూకట్‌పల్లి/అల్లాపూర్‌: పూలను పూజించే అపురూపమైన పండుగ బతుకమ్మ తెలంగాణ ఆడపడుచుల ఆత్మగౌరవానికి, విశిష్ట సంస్కృతి సంప్రదాయాలకు సజీవ ప్రతీక అని టీపీసీసీ ఉపాధ్యక్షుడు, కూకట్‌పల్లి నియోజకవర్గ కాంగ్రెస్ పార్టీ ఇన్‌చార్జ్ బండి రమేష్ కొనియాడారు. సద్దుల బతుకమ్మ వేడుకలను పురస్కరించుకుని కూకట్‌పల్లి నియోజకవర్గంలోని పలు ప్రాంతాల్లో స్థానిక మహిళలతో కలిసి ఆయన సంబరాల్లో పాల్గొన్నారు.
వివేకానంద నగర్‌లో వైభవంగా వేడుకలు – ఆడిపాడిన బండి రమేష్:
అల్లాపూర్‌ డివిజన్ పరిధిలోని శ్రీ వివేకానంద నగర్ కాలనీలో వేముల సత్యం ఆధ్వర్యంలో బతుకమ్మ సంబరాలను అత్యంత వైభవంగా నిర్వహించారు. ఈ వేడుకలకు ముఖ్య అతిథిగా విచ్చేసిన బండి రమేష్ మహిళలతో కలిసి బతుకమ్మల చుట్టూ చేరి ఉత్సాహంగా ఆడిపాడారు. ప్రకృతిని దైవంగా ఆరాధిస్తూ, తీరొక్క పూలతో గౌరమ్మను కొలిచే సంప్రదాయం ప్రపంచంలో మరెక్కడా కనిపించదని ఆయన పేర్కొన్నారు. తెలంగాణ రాష్ట్ర విశిష్టతను అంతర్జాతీయ స్థాయిలో నిలబెట్టిన ఘనత బతుకమ్మ పండుగకే దక్కుతుందని తెలిపారు.
మహిళలకు బహుమతుల ప్రదానం:
తెలంగాణ ఆడపడుచులందరూ ఆయురారోగ్యాలతో, అష్టైశ్వర్యాలతో, సుఖశాంతులతో వర్ధిల్లాలని బండి రమేష్ ఆకాంక్షించారు. ఈ సందర్భంగా వేడుకల్లో ప్రతిభ కనబరిచిన మహిళలకు, కాలనీ ఆడపడుచులకు ఆయన ప్రత్యేక బహుమతులను అందజేసి సత్కరించారు. కాలనీ నిర్వాహకుడు వేముల సత్యం చేపట్టిన ఏర్పాట్లను ఆయన అభినందించారు. ఈ కార్యక్రమంలో కాంగ్రెస్ పార్టీ స్థానిక నాయకులు, కార్యకర్తలు, కాలనీ అసోసియేషన్ ప్రతినిధులు మరియు మహిళలు పెద్ద సంఖ్యలో పాల్గొన్నారు.
