అల్లాపూర్‌ దుర్గామాత మండపాల్లో ఎమ్మెల్యే మాధవరం కృష్ణారావు ప్రత్యేక పూజలు!
సూర్య సిటీ & రీజినల్ డెస్క్, కూకట్‌పల్లి/అల్లాపూర్‌: దేవీ శరన్నవరాత్రి ఉత్సవాలను పురస్కరించుకుని కూకట్‌పల్లి నియోజకవర్గ పరిధిలోని అల్లాపూర్‌ డివిజన్‌లో ఆధ్యాత్మిక శోభ వెల్లివిరిసింది. డివిజన్‌లోని పలు ప్రాంతాలలో కొలువుదీరిన దుర్గామాత అమ్మవార్లను కూకట్‌పల్లి శాసనసభ్యులు మాధవరం కృష్ణారావు, మేడ్చల్ జిల్లా మైనారిటీ విభాగం అధ్యక్షులు గౌసుద్దీన్‌లతో కలిసి సందర్శించి ప్రత్యేక పూజలు నిర్వహించారు.
వివిధ కాలనీల్లో పూజా కార్యక్రమాలు:
అల్లాపూర్‌ డివిజన్ పరిధిలోని శ్రీ వివేకానంద నగర్, గాయత్రి నగర్, పర్వత్‌ నగర్‌లలో భక్తులు ప్రతిష్టించిన దుర్గామాత మండపాలకు విచ్చేసిన ఎమ్మెల్యే మాధవరం కృష్ణారావుకు నిర్వాహకులు, స్థానిక ప్రజలు పూర్ణకుంభంతో ఘన స్వాగతం పలికారు. అనంతరం అమ్మవారికి ప్రత్యేక హారతులు సమర్పించి తీర్థప్రసాదాలు స్వీకరించారు. నియోజకవర్గ ప్రజలందరిపై జగన్మాత కరుణాకటాక్షాలు ఉండాలని, ప్రతి ఇంటా సుఖసంతోషాలు, ఆయురారోగ్యాలు వర్ధిల్లాలని ఈ సందర్భంగా ఆయన ప్రార్థించారు.
భారీగా తరలివచ్చిన నేతలు, స్థానికులు:
ఈ కార్యక్రమంలో డివిజన్ అధ్యక్షులు లింగాల ఐలయ్య, స్థానిక నాయకులు బొల్లు శ్రీనివాస్, జగన్, మధు, బాబా, బ్రహ్మం, పిల్లి తిరుపతి, రాజు, కృష్ణారావులతో పాటు కాలనీవాసులు, మహిళా భక్తులు పెద్ద సంఖ్యలో పాల్గొని అమ్మవారి ఆశీస్సులు అందుకున్నారు.
